Сарбаз Қ.Оспановтың қазасына қатысты Өскемен гарнизонындағы әскери бөлімдердің бірінің батальон және взвод командирлеріне қатысты қылмыстық іс тергеліп, сотқа жолданды, деп хабарлайды F16.kz.
Бас әскери прокуратураның мәліметінше, тергеу барысында лауазымды тұлғалардың бірнеше рет жарғыдан тыс қарым-қатынасқа жол бергені, қаза болған әскери қызметшіге және оның алты қызметтесіне психологиялық қысым көрсеткені анықталды.
Взвод командирі қару-жарақты сақтау тәртібіне тиісті бақылау жүргізбей, қызметтік міндеттерін орындаудан шет қалған. Тергеу әрекеттерін тиісті түрде ұйымдастыру нәтижесінде жеткілікті дәлелдемелер базасы жедел жинақталды, қысқа мерзімде қажетті сараптамалар жүргізілді, қылмыстарға қатысы бар барлық тұлғалар анықталды, – делінген Бас әскери прокуратура хабарламасында.
Қабылданған шаралар аясында әскери бөлім командирі мен оның екі орынбасары қызметінен босатылып, тағы 9 лауазымды тұлға тәртіптік жауапкершілікке тартылған.
Ведомство мәліметінше, әскери қызметшілердің қаза болу деректерін тергеу тәсілдері жетілдіріліп, тиісті органдар арасында сараптамаларды жедел жүргізуге бағытталған меморандумға қол қойылған.
