Бүгін Өскеменде ұлы ақын, ойшыл және ағартушы Абай Құнанбайұлының 180 жылдығына орай салтанатты гүл қою рәсімі өтті, деп хабарлайды F16.kz.
Шығыс Қазақстан облысы әкімінің баспасөз қызметінің хабарлауынша, іс-шараға аймақ басшысы Нұрымбет Сақтағанов, Қазақстан халқы Ассамблеясының өкілдері, қала тұрғындары, қоғам өкілдері, зиялы қауым және жергілікті атқарушы органдар қызметкерлері қатысты.
Абай – тарих пен мәдениеттегі мәңгілік тұлға. Оның сөзі ұлттық сана-сезімді оятып, гуманизм құндылықтарын орнықтырды және ағартушылыққа жол сілтеді. Абайдың ойлары бүгін де өміршең – олар заманауи кезеңмен үндес. Ұлы ақынның рухани мұрасы болашақ ұрпақтың жолын нұрландырып, ізгі істерге, Отанға, халқына, ақиқатқа деген сүйіспеншілікке шабыттандыра бермек, – деп атап өтті өз сөзінде Нұрымбет Сақтағанов.
Абайдың 180 жылдық мерейтойына орай алаңда оның өміршең өлеңдері, даналыққа толы туындылары шырқалды. Бұл шығармалар бүгінгі күні де адамдардың жүрегінен орын тауып, өзектілігін жоғалтпай келеді.
Облыс әкімі атап өткендей, Президент Қасым-Жомарт Тоқаевтың бастамасымен елімізде және шетелде ұлы ақынның мерейтойын жоғары деңгейде атап өтуге арналған ауқымды іс-шаралар өткізілуде. Мемлекет басшысы бірнеше рет Абай мұрасының жаңа сапалы ұлт қалыптастыру ісіне қызмет ететінін ерекше атап өткен.
Абай білімді қастерлеуге, дүниеге ашық болуға, елінің болашағы үшін жауапты болуға үндеді. Бүгінде оның өсиеттері қазақстандықтардың бірнеше буынын жасампаз еңбекке, қоғамдағы бейбітшілік пен келісімді нығайтуға насихаттайды.
Ақын ескерткішіне гүл шоқтарын қоюға келген көпшілік оның адалдық, еңбексүйгіштік, ағартушылық және өзара құрмет туралы философиялық идеялары қоғамның рухани дамуының негізі екенін атап өтті.
Айта кетейік, ақынның 180 жылдығына орай облыс орталығында ескерткіш қайта жаңартылып, оған іргелес аумақ абаттандырылды.
