Өскемен қаласына Skywell маркалы жаңа электробустар әкелінді. Бұл туралы жолаушылар тасымалымен айналысатын «Марат-М» компаниясы әлеуметтік желідегі парақшасында мәлімдеді, деп хабарлайды F16.kz.
Бүгінде заманауи қоғамдық көліктер автопаркке жеткізіліп, жолаушылар тасымалдау қызметіне дайындау жұмысы басталып кетті.
Компания өкілдерінің мәлімдеуінше, электробустар алдағы уақытта арнайы сынақтан өтеді. Содан кейін оларды қалаішілік бағыттарға шығару мәселесі қарастырылмақ. Қазірдің өзінде тұрғындар арасында жаңа қоғамдық көлікке деген қызығушылық артып отыр.
Айта кетейік, соңғы жылдары Қазақстанның бірқатар қаласында экологиялық көліктер қолданысқа енгізіліп жатыр. Өскеменге электробустардың келуі – осы бағыттағы маңызды қадамдардың бірі.
Электробус – экологиялық тұрғыдан тиімді әрі заманауи көлік құралдарының бірі. Олар толықтай электр қуатымен жұмыс істейді, сондықтан қоршаған ортаға зиянды түтін шығармайды. Мамандардың айтуынша, мұндай көлік түрін енгізу өндіріс орындары көп шоғырланған Өскемен сияқты қалаларда аса маңызды. Бұл өз кезегінде ауа сапасын жақсартуға және тұрғындардың денсаулығын қорғауға оң әсер етеді.
Сонымен қатар, электробустардың тағы бір артықшылығы – олардың дыбысы бәсең, яғни қаладағы шуды төмендетуге мүмкіндік береді. Жаңа техникалар жолаушыларға да қолайлы: заманауи жабдықтармен қамтылып, ыңғайлы қозғалысқа бейімделген.
