Отбасы банк ислам ипотекасын заңнамаға енгізу мәселесін көтеріп отыр. Бұл туралы Қазақстан құрылысшылар одағы және ірі құрылыс компаниялары өкілдерімен болған кездесуде айтылды, деп хабарлайды F16.kz.
Жиында ислам ипотекасын дамыту және оны тұрғын үйді қаржыландыру нарығына енгізудің түйткілдері талқыланды.
Банк өкілдерінің айтуынша, Қазақстанда ислам қаржы құралдарына сұраныс жоғары. Сарапшылар мұсылмандардың 55%-ы балама болмағандықтан дәстүрлі банк өнімдерін пайдалануға мәжбүр екенін айтады. Егер таңдау мүмкіндігі болса, олар шариғат талаптарына сай қаржы құралдарына басымдық береді.
Бізге күн сайын діни наным-сенімге байланысты дәстүрлі ипотеканы пайдалана алмайтын азаматтардан өтініштер түседі. Бұл отбасылар да баспаналы болып, қаржылық тұрақтылыққа қол жеткізгісі келеді. Ислам ипотекасы оларға тиімді шешім болуы мүмкін. Бізге бұл жаңа өнім ғана емес, қаржыландыруға тең қол жеткізуді қамтамасыз ету мәселесі. Қазір заңнамалық бастамалар бойынша жұмыс бастап кеттік және жобаны кезең-кезеңімен жүзеге асырамыз, — деді Отбасы банкінің басқарма төрағасы Ләззат Ибрагимова.
Отбасы банкінің мәліметінше, Қазақстанда 2 миллионнан астам адам (елдегі ересек халықтың шамамен 20%-ы) тұрғын үй жағдайын жақсартуға мұқтаж. Бірақ қазір екінші деңгейлі банктер ұсынатын ипотекалық бағдарламаларда ислам тәртібімен қаржыландыру тетіктері қарастырылмаған.
Отбасы банк ислам қаржы өнімдерін енгізу клиенттердің діни сенімін ескере отырып, тұрғын үйді қаржыландыруға қол жеткізу мүмкіндігін кеңейту жолы деп есептейді. Банкте қазір бұл бағытта жұмыс істейтін арнайы жұмыс тобы құрылып, болашақ өнімдердің тұжырымдамасы әзірленген. Қазір мамандар ислам банкингі тетіктерін қолданыстағы тұрғын үй құрылыс жинақ жүйесіне бейімдеу мүмкіндіктерін талдап жатыр.
Ендігі басты міндет – «Тұрғын үй құрылыс жинақтары туралы» заңға өзгерістер енгізу. Бұл түзетулер Отбасы банкке ислам банкі операцияларын жүргізуге мүмкіндік береді
Ислам ипотекасы — бұл шариғат талаптарына сай берілетін тұрғын үй қаржыландыру түрі. Оның басты ерекшелігі — пайыз (өсімпұл) алынбайды, себебі ислам дінінде пайызбен қарыз беруге тыйым салынған (риба). Банк ақша бермейді, оның орнына үйді өзі сатып алып, клиентке бөліп төлеуге сатады немесе жалға беру арқылы кейін сатып алу тетігін қолданады. Төлем сомасы алдын ала келісіліп, өзгермейді. Пайыз есептелмейді.
