Бүгін, 9 шілдеде Астанада Перизат Қайрат (суретте) пен Ғайни Алашбаеваға қатысты қылмыстық іс бойынша сот процесі басталды, деп хабарлайды F16.kz.
Аталған ісі бойынша алғашқы тыңдалым өтті. Бұл іс алаяқтық және қылмыстық жолмен алынған мүлікті заңдастыру фактілеріне байланысты қозғалған.
Алдын ала тыңдау кезінде күдіктілер сот отырысына бұқаралық ақпарат құралдарының қатысуына қарсы екендіктерін жеткізді. Сонымен қатар олар процесс барысында фото-видео түсірілім жүргізуге тыйым салуды сұрады. Осыдан кейін отырыстың ашық немесе жабық түрде өтетінін шешу үшін судьялар кеңесу бөлмесіне кетті. Нәтижесінде сот процесі жартылай жабық түрде өтетіндігі айтылды.
Перизат Қайрат пен оның анасына қатысты сот ішінара жабық форматта өтеді. Қылмыстық істі жабық форматта жүргізу туралы арыз жартылай қанағаттандырылды. Басты сот талқылауын жалпы тәртіпте ашық сот отырысы түрінде 14 шілдеге белгілеу туралы шешім қабылданды, – деді судья Сабыржан Каримов кеңесу бөлмесінен шыққаннан кейін.
Түсіндіре кетейік, айыпталушыларды сұраққа алу сәттері көпшілікке көрсетілмейді. Соттың қалған отырыстары ашық форматта жүргізіледі.
Бұған дейін Қаржылық мониторинг агенттігі Қайрат пен Алашбаеваға қатысты сотқа дейінгі тергеу аяқталғанын хабарлаған. Қылмыстық іс материалдары 109 томнан тұрады. Тараптар онымен биылғы 19 наурызда таныса бастаған. Іс бойынша келтірілген залал көлемі – 3,5 миллиард теңге, 865 миллион теңгенің мүлкіне тыйым салынған.
