Ішкі істер министрлігі танымал интернет-ресурстарда қонақүй нөмірлері мен пәтерлерді брондау кезінде жасалатын алаяқтықтың жаңа түрі туралы ескертеді, деп хабарлайды F16.kz тілшісі Polisia.kz сайтына сілтеме жасап.
– Пәтерлерді интернет арқылы брондау кезінде пайдаланушыларға банк картасының деректерін сұрататын хабарламалар келеді. Алайда, бұл деректер жеке кабинетте бар және қайта енгізуді талап етпейді. Осыған байланысты ІІМ азаматтарды басқа қалаға немесе елге демалысқа, сондай-ақ іссапарға шыққанда аса мұқият болуға шақырады, – деп жазады дерек көзі.
Мамандардың пікірінше, алаяқтарға алданбас үшін мынадай ережелерді ұстану қажет:
- сайттың мекенжайын тексеріңіз: фишингтік сайттарда домен атауында ұсақ өзгерістер болуы мүмкін (мысалы, бір әріптің қосылуы немесе соңғы жағындағы өзгерістер;
- банк картаңыздың деректерін пәтер иесімен чатта бөліспеңіз;
- тым төмен бағадағы ұсыныстарға күмәнмен қараңыз – бұл алдаудың белгісі болуы мүмкін;
- пәтерді немесе қонақүй нөмірін жалдамас бұрын пікірлерді оқып шығыңыз, олардың жарияланған уақытын және жарнаманың сайтта қай кезден бастап тұрғанын тексеріңіз, бірнеше жылдан бері жарнамаланып келе жатқан пәтерлер – сенімділіктің бір белгісі;
- пәтер иесі толық алдын ала төлем жасауды талап еткен жағдайда абай болыңыз, қонақүй нөмірі мен пәтерге төлемді тек сол жерге барып, олардың бар екеніне көз жеткізгеннен кейін ғана жасаңыз;
- күдікті хабарламалардан сақ болыңыз: мессенджерлерде, электрондық поштада немесе әлеуметтік желілерде жіберілген сілтемелер жалған сайттарға апаруы мүмкін;
- пәтерді немесе қонақүй нөмірін тек танымал және сенімді платформалардан брондаңыз: егер сайт күмән тудырса, тәуекелге бармаған дұрыс.
