Мемлекет басшысы Қасым-Жомарт Тоқаев Қазақстан халқын Астана күнімен құттықтады, деп хабарлайды F16.kz Ақордаға сілтеме жасап.
Президент құттықтау сөзінде еліміздің қоғамдық-саяси және іскерлік өмірінде Астананың алар орны зор екенін атап өтті.
Биыл бұл мереке Домбыра күнімен тұспа-тұс келіп отыр. Мұның символдық мәні зор. Қазақтың қасиетті қара домбырасы Ұлы даланың мыңжылдық бірегей мәдени мұрасын әйгілейді. Ал елордамыз Қазақстанның тұрақты әрі қарқынды өсіп-өркендеуін және жасампаз ұлттың жарқын болашаққа ұмтылысын айшықтай түседі.
Бүгінде Астана – еліміздің қоғамдық, саяси және іскерлік ордасы. Дәл осы жерде халқымыздың болашағына қатысты маңызды шешімдер қабылданады, озық идеялар іске асырылып, биік мақсаттар орындалады. Мұнда білімпаздық пен еңбекқорлық құндылықтары берік орнығып, жұртымыздың ынтымағы мен келісімі нығая береді, — деді Қасым-Жомарт Тоқаев.
Мемлекет басшысы елорда бүгінде халықаралық қауымдастықтар тұрақты бас қосатын, әлемдік бітімгершілік бастамаларға мұрындық болатын бейбітшілік бесігіне айналғанын айтты.
Астана Орталық Еуразияның жауһары, заманауи Қазақстанның келбеті саналады. Халықаралық қауымдастық бас қаламызды бітімгершілік бастамаларды жүзеге асырып, жаһандық диалог орнату ісінде ерекше рөл атқаратын бейбітшілік шаһары ретінде біледі.
Сүйікті қаламыз өркендеп, гүлдене берсін! Баршаңызға зор денсаулық, бақ-береке тілеймін! — деді Президент.
