Еліміздің Бас прокуратурасының сұрау салуы бойынша Ресей Федерациясынан аса ірі мөлшерде бюджет қаражатын жымқырды деген күдікке ілінген азамат экстрадицияланды, деп хабарлайды F16.kz.
Тергеу барысында аталған тұлға құрылыс компаниясының басшысы бола отырып, 2020 жылдан 2022 жылға дейінгі аралықта адамдармен алдын ала сөз байласу арқылы жалған шарттар жасасып, аффилирленген компаниялар арқылы ақша аудару жолымен «Самұрық-Энерго» АҚ-ның еншілес ұйымынан 8,5 млрд теңгеден астам бюджет қаражатын жымқырғаны анықталды.
Аталған қаражат Ақмола облысында жел электр станциясын салуға арналған болатын.
Қылмыс жасағаннан кейін күдікті жасырынып, оған халықаралық іздеу жарияланған.
Биылғы ақпан айында ол Ресей Федерациясының аумағында ұсталып, Қазақстан Республикасы Бас прокуратурасының сұрау салуы бойынша оны экстрадициялау туралы шешім қабылданды. Қазір күдікті тергеу изоляторына қамалды. Қылмысқа қатысы бар басқа тұлғалар биылғы мамырда әртүрлі мерзімге бас бостандығынан айыру жазасына кесілген, – деп хабарлады Бас прокуратура.
Осы қылмысы үшін күдіктіге мүлкін тәркілеу және 5 жылдан 10 жылға дейінгі мерзімге бас бостандығынан айыру жазасы қарастырылған.
Қазақстанның Бас прокуратурасы шетелде жасырынып жүрген тұлғаларды іздестіру және оларды қылмыстық жауаптылыққа тарту бойынша жүйелі жұмыс жүргізуді жалғастырады.
