Риддер қаласының тұрғындары әлеуметтік желілерде таралған жол жиегінде жатқан жас шыршалардың видеосын қызу талқылады. Осы жағдайға байланысты Риддер орман шаруашылығы ресми жауап берді, деп хабарлайды F16.kz.
Бейнероликті қала тұрғындарының бірі түсіріп, әлеуметтік желіге салған. Іле-шала желі қолданушылары кесілген қылқан жапырақты ағаштардың кімге тиесілі екенін және олардың қайда кетіп жатқанын сұрап, алаңдаушылық білдірді.
Қоғамды дүрліктірген жағдайды Риддер орман шаруашылығының өкілдері түсіндірді. Ведомствоның хабарлауынша, бейнежазбадағы ағаштар «Риддер орман шаруашылығы» КММ тұқымбағынан алынған.
Бұл ағаштар орман өнімдерін дайындауға рұқсат беретін бұйрық негізінде қазып алынып, сатып алушыға жеткізу үшін әзірленген. Барлық жұмыс Қазақстан Республикасының орман саласына қатысты қолданыстағы заң талаптарына толық сәйкес орындалды. Тұрғындардың алаңдауына себеп жоқ, табиғатты қорғау нормалары бұзылмаған, – делінген ресми жауапта.
