Шығыс Қазақстан облысының мемлекеттік кірістер департаменті кейбір азаматтарға салық мәселелері бойынша ақпараттық-түсіндіру қызметін көрсету үшін арнайы сервис тобы құрылғанын хабарлады. Бұл топ салық органдары көрсететін мемлекеттік қызметтерді алу, салық міндеттемелерін орындау, соның ішінде жеке тұлғалардың декларациясын толтыру және тапсыру мәселелері бойынша көмек көрсетеді.
Сервис тобының қызметі келесі санаттағы салық төлеушілерге арналған:
– I немесе II топтағы мүгедектігі бар адамдар;
– екі айдан астам уақытқа уақытша еңбекке жарамсыз деп танылған азаматтар;
– бөгде адамның күтімі мен көмегіне мұқтаж, жасы 80-нен асқан қарттар;
– жалпыға қолжетімді телекоммуникация желілері жоқ шалғай елді мекендерде тұратын тұрғындар.
Сервис тобын тұрғылықты жерге шақыру үшін мемлекеттік кірістер органдарының байланыс орталығына 1414 нөмірі арқылы өтінім беру қажет. Мамандар бекітілген кестеге сәйкес аптаның сейсенбі және бейсенбі күндері шығады.
Бұл бастама азаматтарға салық қызметтерін қолжетімді етіп, әсіресе әлеуметтік тұрғыда осал топтарға қолдау көрсетуге бағытталған.
