Шығыс Қазақстан облысының Самар ауданында жергілікті тұрғындар үшін маңызды әлеуметтік нысандар салынып жатыр. Ауылдық елді мекендердің әлеуметтік дамуына серпін беретін бұл жобалар облыс басшылығының тікелей тапсырмасымен қолға алынды, деп хабарлайды F16.kz.
Аудан әкімі Серік Жеңісұлы Миролюбовка ауылында салынып жатқан фельдшерлік-акушерлік пункттің және Жұмба ауылында іргесі қаланған спорт модулінің құрылысымен танысып, атқарылған жұмыстарды тексерді. Өңір басшылығының қолдауымен бой көтеріп жатқан нысандардың құрылысы аяқталуға жақын, мердігерлер қорытынды жұмыстарға кірісіпті.
Аймақ басшысы Нұрымбет Сақтағанов есептік кездесулерде шалғай елді мекендерді дамытуға ерекше назар аударып, нақты тапсырмалар берген болатын. Миролюбовка мен Жұмбадағы бұл нысандар – сол тапсырмалардың жүйелі түрде орындалып, нақты іске асырылғанын көрсетеді.
Аудан әкімі Серік Жеңісұлы өз сөзінде Жұмба ауылы үшін спорт модулінің маңызын атап өтті.
Жұмба ауылында соңғы 40 жылдан астам уақыт бойы бірде-бір жаңа әлеуметтік нысандар салынбаған. Енді ауыл балалары мен жастарының спортпен айналысуына барлық жағдай жасалады. Спорт модулі заманауи талаптарға сай жабдықталған, ішінде киім ауыстыратын бөлмелер, жуынатын кабиналар және қажетті спорт құрал-жабдықтары бар. Қазір нысанды электр желісіне және жылу жүйесіне қосу жұмысы жүргізіліп жатыр, – деп жазды ол өзінің әлеуметтік желідегі парақшасында.
Сонымен қатар Миролюбовка ауылында жергілікті жұрт көптен күткен фельдшерлік-акушерлік пункт жақын арада пайдалануға берілмек. Бұл ауыл тұрғындары үшін үлкен қуаныш. Жаңа медицина мекемесі іске қосылған соң, тұрғындар көмекті аудан орталығына бармай-ақ ауылда ала алады. Бұл әсіресе егде жастағы адамдар мен жас аналар үшін өте қолайлы.
Айта кету керек, биыл Самар ауданында ауқымды жұмыстар атқарылып, бұрыннан шешімін таппай жүрген күрделі мәселелердің түйіні тарқатылды. Бүгінде ол жобалар кезең-кезеңімен іске асып, ел игілігіне беріле бастады.
Әлеуметтік инфрақұрылымды дамыту бағытындағы мұндай қадамдар аудан халқының өмір сүру сапасын арттырып, жайлы орта қалыптастырады.
Самар ауданы туристік аймақ болғандықтан, жаз мезгілінде өңірге келушілер саны айтарлықтай артады. Осыған байланысты Миролюбовка ауылында ашылатын фельдшерлік-акушерлік пункт тек жергілікті тұрғындар үшін емес, демалушыларға да тиімді болмақ. Туристерге қажет болған жағдайда алғашқы медициналық көмек көрсету мүмкіндігі туады.
Жалпы, жаңа медициналық пункт пен спорт нысанының іске қосылуы Самар ауданындағы ауылдардың әлеуметтік дамуына серпін беріп, тұрғындардың тұрмыс сапасын жақсартуға оң әсерін тигізеді.
