Балалар үйіндегі 20 жасөспірім Samruk Umiti кәсіби бағдарлау жобасына қатысып, Шығыс Қазақстан облысындағы Жоғары политехникалық колледжге электроэнергетика мамандығына грант негізінде тегін оқуға жолдама алды, деп хабарлайды F16.kz.
Мұндай мүмкіндікті «Самұрық-Қазына» компаниялар тобы атанан ӨскеменГЭС ұсынды. Грант иегерлері тегін оқумен қатар ай сайын шәкіртақы алып, тегін тамақтанып, жатақханада ақысыз тұрады. Үш жыл ішінде студенттер ГЭС базасында өндірістік тәжірибеден өтіп, нақты мамандық бойынша кәсіби машықтарын жетілдіреді. Ал үздік нәтиже көрсеткен түлектер болашақта осы кәсіпорынға жұмысқа орналасады, әлеуметтік пакетпен және тұрақты жалақымен қамтылады.
Samruk-Kazyna Trust қоры жүзеге асыратын бұл жоба аясында балалармен менторлар және психологтар тұрақты жұмыс жүргізіп келеді. Олар жасөспірімдердің қаржылық және құқықтық сауаттылығын арттырып, әлеуметтік маңызды дағдыларды қалыптастыруға көмектеседі.
Сонымен қатар оқушылар кәсіби колледждерге, Үлбі металлургия зауытына, Өскемен ГЭС-іне, KEGOC, «Қазпошта» және «ҚТЖ» компанияларының филиалдарына барып, өндіріс орындарымен танысады.
Фото: ШҚО өңірлік коммуникациялар қызметі
