Сарыбелде демалушылар саны жыл санап артып келеді. Бүгінде өңірдегі туризмді дамытуға баса назар аударылған. Бұқтырма су қоймасының Самардағы жағалауында да инфрақұрылымды дамыту жұмыстары белсенді жүргізіліп жатыр, деп хабарлайды F16.kz.
Қазіргі уақытта жағажайға апаратын Миролюбовка ауылының жолы жөнделіп жатыр. Сондай-ақ туристік маусымда шұғыл көмек көрсететін медициналық пункттің құрылысы басталған.
ШҚО әкімінің бірінші орынбасары Жақсылық Омар жұмыс сапарымен Сарыбелге барып, жағажайды дамытуға қатысты алдағы жоспарларды нақтылады.
Мұндағы негізгі мәселелердің бірі – демалыс базаларындағы электр тапшылығы. Оны шешу үшін қосалқы станса салу мүмкіндігі қарастырып жатырмыз. Сондай-ақ облыс әкімі Нұрымбет Сақтағановтың тапсырмасы бойынша, жағалау бойымен Арбат салу жобасы әзірлену үстінде. Онда сауда орындары, дәмханалар мен түрлі іс-шара өткізуге арналған алаң болады, — дейді ол.
Алдағы жылдары Самардағы аудандық ауруханаға жөндеу жұмыстарын жүргізіп, туристік ақпараттық орталық салу жоспарланып отыр. Сондай-ақ Миролюбовка ауылындағы үйлер абаттандырылады.
