Кәсіпкер Шахмұрат Мүтәліп Астана халықаралық қаржы орталығы алаңында мыс, қорғасын, мырыш өндіру мен байытуға маманданған екі компанияны тіркеді. Олардың бірі KazZinc Group Ltd деп аталды. Бұл туралы «Курсив» сайты жазды, деп хабарлайды F16.kz.
Бұған дейін Ш.Мүтәліптің «Казцинк» компаниясының 70% акциясын сатып алу жөнінде швейцариялық трейдер Glencore Plc-пен келіссөз жүргізіп жатқаны мәлім болған.
Кеше, 21 қаңтарда Астанадағы қаржы орталығы алаңында KazZinc Group Ltd компаниясы тіркелді. Оның иесі әрі бас директоры – кәсіпкер, Integra Construction KZ құрылыс компаниясының иесі Шахмұрат Мүтәліп. Компания мыс өндіру және байыту, сондай-ақ қорғасын мен мырыш өндіру саласында қызмет көрсетеді деп жазылған.
Дәл осы күні Мүтәліп АХҚО-да тағы бір кен өндіруші компания – Central Asia Resources Holding Ltd-ті құрды. Оның қызмет саласы KazZinc Group компаниясымен бірдей. Айта кетерлігі, екі компанияның да жарғылық капиталы небары 100 АҚШ долларына тең.
Былтыр қарашада Bloomberg агенттігі Мүтәліптің Қазақстандағы мырыш пен алтын өндіретін ең ірі компания — «Казцинк»-тің 70% акциясын сатып алу бойынша швейцариялық трейдер Glencore Plc-пен келіссөздер жүргізіп жатқанын хабарлады. Жасалуы мүмкін мәміле құны шамамен 3,5 млрд АҚШ долларына бағаланған. Жаңадан тіркелген компаниялар Шахмұрат Мүтәліп сатып алуды жоспарлап отырған «Казцинкті» басқару үшін құрылатын корпоративтік құрылымның бір бөлігі болуы мүмкін деп жазады «Курсив».
Сонымен қатар желтоқсан айында Financial Times басылымы Мүтәліпті әлемдегі жетекші әртараптандырылған тау-кен металлургия компанияларының бірі – ERG-тегі 40% үлесті сатып алуы мүмкін әлеуетті сатып алушылардың қатарына қосты. Бұл үлесті ол холдингтің тең иелерінің отбасыларынан, атап айтқанда қайтыс болған Александр Машкевичтің мұрагерлерінен, сондай-ақ Патох Шодиевтен сатып алуы мүмкін деген болжам бар.
