Бүгін Үлкен Нарын ауылында SCO Youth Dialogue форумы басталды. Оған Шанхай ынтымақтастық ұйымы (ШЫҰ) елдерінің жастары да қатысып жатыр, деп хабарлайды F16.kz.
Форум алаңында Қытай, Ресей, Өзбекстан, Тәжікстан және Қырғыз елінің өкілдері бас қосты. Жас көшбасшылар, еріктілер және қоғам белсенділері орнықты дамуды нығайту шараларын талқылап, жастар бастамаларын жүзеге асыру тәжірибесімен алмасты, сондай-ақ ШЫҰ елдері арасындағы ынтымақтастықтың жаңа бағыттарын айқындады.
Біздің Президенттің бастамасы кең қолдау тапты, бұл шараға қатысуға көптеген елдің өкілдері қызығушылық білдірді. Қазіргі жастар белсенді, табанды және өте дарынды. Форум қорытындысы бойынша жастар ұйымдары арасында бірлескен даму мен ынтымақтастық тұжырымдамасын әзірлеу туралы сөз болады. Ең маңыздысы, мұндай ауқымды шара алғаш рет үлкен қалаларда емес, шалғай ауданның орталығында өтіп отыр. Әдетте мұндай іс-шаралар мегаполистерде ұйымдастырылады, ал ауыл жастары тасада қалады. Бұл форум – алғашқы қарлығаш әрі келгендердің бәріне шабыт берді, – деді Мәдениет және ақпарат министрлігінің Жастар және отбасы істері комитетінің төрағасы Қайрат Қамбаров.
Айта кетейік, форум 2024 жылғы шілдеде Астанада өткен «ШОС+» форматындағы саммитте қол жеткізілген келісімдер аясында өткізіліп отыр. Сол кезде Қазақстан Президенті Қасым-Жомарт Тоқаев жаһандық сын-қатерлер жағдайында жастар бірлігінің маңыздылығын және бейбітшілік пен орнықты даму жолында бірігіп әрекет етудің қажеттілігін ерекше атап өткен. Осы тұрғыдан алғанда дәл Шығыс Қазақстанның алғашқы болып ШЫҰ елдерінің жас көшбасшыларын қабылдауы – үлкен мәртебе. Қонақтарды жылы қабылдап, жоғары деңгейде ұйымдастыру жұмыстары атқарылды. Форумға қатысушылар өңірдің қайталанбас табиғатына тәнті болып, мұндай атмосфера жаңа идеяларға шабыт беретінін айтты.
Мұндай кездесуге қатысу – мен үшін үлкен мәртебе. Бұл – Қытай мен Орталық Азия елдері арасындағы достықты нығайту, бір-біріміздің мәдениетті тереңірек тану үшін үлкен мүмкіндік. Мен Қазақстанға алғаш рет келіп тұрмын және осы елдің кең байтақ даласына, керемет табиғатына, қонақжайлығына тәнті болдым. Мұның бәрі жүректе ерекше әсер қалдырып, болашақтағы ынтымақтастыққа шабыт береді, – деді ҚХР делегациясының өкілі әрі аудармашы Су Чань Юн.
Үлкен Нарындағы форум – жастар арасында өзара сенім мен ашық диалогтың, бірліктің шынайы алаңына айналды. Ол ШЫҰ елдері жастары арасындағы серіктестікті нығайтып, бірлескен жобалар мен жаңа бастамаларға жол ашты.
Ерекше әсер алдым. Саф ауа, шынайы қонақжайлық, ұйымдастырудың жоғары деңгейі. Мұндай іс-шаралар пікір алмасумен шектелмей, жастарды біріктіруге, көшбасшылық қасиеттерді дамытуға және адами байланыстарды нығайтуға бағытталғаны аса маңызды. Бұл кезде шекаралар жойылып, жаңа мүмкіндіктер ашылады және жастар жобаларын іске асыруға нақты құралдар пайда болады, – деді Ресей делегациясының мүшесі Екатерина Забродная.
