Шемонаиха ауданында аса ірі көлемде есірткі затын заңсыз сақтаған тұрғынды ұстады. Ол қарасораны тамаққа қосып пайдаланған, деп хабарлайды F16.kz.
ШҚО полиция департаментінің мәліметінше, есірткі қылмысына қарсы іс-қимыл басқармасының қызметкерлері аудандық полиция бөлімімен бірлесіп, 31 жастағы жергілікті тұрғынның бірнеше ай бойы жабай қарасора (конопля – ред.) өсімдігін жинаумен айналысқанын анықтаған. Ер адам өсімдікті елді мекен сыртынан жинап әкеліп, тұрып жатқан үйінде жеке пайдалану үшін сақтаған. Есірткі затын ол ерекше тәсілмен қолданған, яғни термиялық өңдеуден кейін тамаққа қосқан. Жеке тұрғын үй мен шаруашылық құрылысына жүргізілген тінту барысында полицейлер өсімдік тектес кептірілген зат салынған төрт полиэтилен пакет тапты. Сараптама қорытындысына сәйкес, тәркіленген зат жалпы салмағы 4 келіден асатын кептірілген қарасора болып шықты. Аталған факті бойынша сотқа дейінгі тергеп-тексеру басталды.
