Бүгін Шығыс Қазақстан облысының әкімі Нұрымбет Сақтағанов XXV қысқы Олимпиада ойындарына жолдама алған өңір спортшыларымен кездесті, деп хабарлайды F16.kz.
Дүбірлі дода биыл 6-22 ақпан аралығында Италияның Милан және Кортина-д’Ампеццо қалаларында өтеді.
Кездесуге облыстық басқармалардың басшылары, спорт мектептерінің директорлары және Қазақстан ұлттық құрамасының фристайл-могул бағытындағы өкілдері қатысты. Атап айтқанда:
Анастасия Городко — халықаралық жарыстардың бірнеше дүркін жүлдегері,
Павел Колмаков — тұрақты түрде жоғары нәтиже көрсетіп жүрген тәжірибелі могулист,
Аяулым Әмренова — болашағынан зор үміт күттіретін жас спортшы,
Юлия Галышева — еңбек сіңірген спорт шебері, Олимпиада ойындарының қола жүлдегері және Әлем кубогы кезеңдерінің бірнеше дүркін жеңімпазы.
Ел намысын, өңірдің абыройын төрт жылда бір өтетін басты спорттық додада қорғау — әр спортшыға бұйыра бермейтін мүмкіндік. Олимпиадаға жолдама — көпжылдық еңбектің, табандылық пен өз күштеріңізге деген сенімнің жемісі. Өңірімізден шыққан мықты спортшылар ұлттық құраманың сапында өнер көрсететінін мақтан тұтамыз, — деді Нұрымбет Сақтағанов.
Аймақ басшысы сөз соңында спортшыларды дайындауға үлес қосқан бапкерлерге, дәрігерлерге, мамандар мен осы жолда қолдау көрсеткен барша жандарға алғыс білдірді. Сондай-ақ алдағы уақытта спортты дамытуға және жаңа чемпиондарды даярлауға тиісті жағдай жасалатынын атап өтті.
Айта кетейік, XXV қысқы Олимпиада ойындарына әлемнің 93 елінен 3500-ден астам спортшы қатысады. Жарыстар спорттың 16 түрі бойынша өтеді.
