Мемлекет басшысы Қасым-Жомарт Тоқаев Шығыс Қазақстан облысының әкімі Нұрымбет Сақтағановты қабылдап, өңірдің әлеуметтік-экономикалық дамуының негізгі көрсеткіштерімен танысты, деп хабарлайды F16.kz.
Кездесу барысында Президентке өңірдің әлеуметтік-экономикалық дамуы мен орнықты өсімін қамтамасыз ету бойынша атқарылып жатқан шаралар туралы баяндалды. Аймақ басшысының айтуынша, 2025 жылы облыстың негізгі салаларында оң динамика қалыптасқан.
Атап айтқанда, инвестиция, құрылыс, ауыл шаруашылығы және сауда салаларында өсім бар. Негізгі капиталға салынған инвестиция көлемі 838 миллиард теңгеден асып, инвестициялық қоржынға 100-ден астам жоба енгізілген. Құрылыс жұмысының көлемі шамамен 460 миллиард теңгеге жетсе, ауыл шаруашылығының жалпы өнімі 550 миллиард теңгеден асқан. Ал сауда-саттық көрсеткіші 2,4 триллион теңгеден жоғары.
Өңірде тұрғын үй құрылысы да қарқынды жүргізіліп жатыр. Былтыр жалпы ауданы 407 мың шаршы метрден асатын тұрғын үй пайдалануға берілген. Жұмыссыздық деңгейі 4,6 пайыз шамасында сақталып, 29 мың адам жұмыспен қамтылған.
Сонымен қатар жұмыспен қамтудың өңірлік картасы аясында биыл 17 мыңнан астам жаңа жұмыс орнын ашу жоспарланып отыр. Жылдың алғашқы тоқсанында 3 мыңнан астам жұмыс орны құрылған.
Әлеуметтік салада да оң өзгерістер бар. Атаулы әлеуметтік көмек алушылар саны азайып келеді. Ауылдық аумақтарды дамыту, көші-қонды қолдау бағытында «Шығыс шақырады» сияқты өңірлік жобалар қолға алынған.
Инфрақұрылымды жаңғырту мәселесіне ерекше көңіл бөлінген. Былтыр облыста 856 шақырым жол мен көшелер жөнделіп, пайдалануға берілді.
Кездесу қорытындысында Мемлекет басшысы өңірдегі экологиялық жағдайды жақсарту, экономиканы әртараптандыру, инвестиция тарту және туризмді дамыту бағытындағы жұмысты күшейтуді тапсырды.
