Бүгін Өскеменнің Борсис Александров атындағы спорт сарайында XXV жазғы Сурдлимпиада ойындарының чемпионы Фаина Мейірмановаға құрмет көрсетілді. Облыс әкімі спортшыға үш бөлмелі пәтер кілтін табыс етті, деп хабарлайды F16.kz.
Естеріңізде болса Фаина Мейірманова былтыр қарашада Токио қаласында өткен ХХV жазғы Сурдлимпиада ойындарында биіктікке секіруден алтын медаль жеңіп алған. Ол 1,79 метр биіктікті бағындырып, рекорд жаңартты.
Спортшымыздың жеңісі еліміздің халықаралық беделін нығайтып, қайсарлық пен табандылықтың жарқын үлгісін көрсетті, — деп атап өткен аймақ басшысы Нұрымбет Сақтағанов спортшыға үш бөлмелі пәтер кілтін табыстады.
Ұлттық құрама сапында жоғары деңгейде өнер көрсетіп келе жатқан шығысқазақстандық спортшының бұл алғашқы жеңісі емес. 2024 жылы ол Тайбэйде өткен сурдо-жеңіл атлетикадан әлем чемпионатында топ жарып, Куала-Лумпурдегі Азия-Тынық мұхиты ойындарының жеңімпазы атанған. Сондай-ақ Қазақстанның бірнеше дүркін чемпионы болды.
Фаинаның жеңісі Шығыс Қазақстан спортының жоғары деңгейін көрсетіп отыр. Оның жетістіктері — көпжылдық жүйелі дайындықтың, бапкерлер штабының кәсіби еңбегінің және өңірдегі спорт ұйымдарының қолдауының нәтижесі. Соңғы екі жылда спортшы халықаралық және республикалық ареналарда тұрақты түрде жоғары нәтиже көрсетіп келеді.
Кездесу соңында спортшы бапкері Богдан Весельскийге және қолдау көрсеткен барша жанкүйерлеріне алғыс білдірді.
Маған ешкім ештеңе айтпады. Пәтер берілетінін осында келгенде бірақ білдім. Бұл – алғашқы жеке пәтерім. Қуанып тұрмын. Жетістігімізді елеп-ескеріп жатқанына ризамын. Жеңіске жетуіме бапкерлерімнің сіңірген еңбегі зор болды. Жанкүйерлердің де қолдауын сезіндім, – деді Фаина Мейірманова.
Сурдлимпиада ойындары — есту қабілеті бұзылған спортшылар арасындағы ең ірі халықаралық жарыс. Ол Халықаралық саңыраулар спорт комитетінің қолдауымен өткізіледі.
