ШҚО-ның инвестициялық әлеуеті артып келеді. Бүгінде жалпы құны бір триллион теңгеден асатын 81 жоба портфелі жасақталып, 64-і белсенді іске асырылу кезеңінде. Бұл туралы ШҚО әкімі Нұрымбет Сақтағанов Орталық коммуникациялар қызметі алаңында өтіп жатқан брифинг барысында айтты, деп хабарлайды F16.kz.
Сондай-ақ биыл жоспар бойынша биыл 15 жоба іске қосылып, 400-ден астам жаңа жұмыс орны құрылмақ.
Мемлекет басшысы Қасым-Жомарт Кемелұлы Тоқаев «елімізге қомақты инивестиция тарту» жөнінде алдымызға нақты тапсырма қойды. Биыл құны 55 млрд теңге болатын 15 жобаны іске қосу жоспарланған. Бұған қыркүйек айында өткен «Altai Invest» форумы айтарлықтай серпін берді. Ол өңірдің қарқынды дамып келе жатқан инвестициялық алаң ретіндегі мәртебесін растады. Шараға 10 елден 300-ден астам қатысушы жиналды. Форум қорытындысы бойынша 740 млрд теңгеге 40 меморандумға қол қойылды, – деді облыс әкімі.
Өңірдің инвестициялық стратегиясында тау-кен металлургия кешенін дамытуға баса назар аударылып отыр. Ол үшін жаңа кен орындарын белсенді игеру, литий материалдары өндірісін дамыту және өңдеу кәсіпорындарын жаңғырту жоспарланған.
Сондай-ақ аймақ басшысы Шығыс Қазақстанда атом энергетикасы үшін отын жеткізетін жетекші өңір мәртебесін күшейту жоспарда бар екенін атап өтті. Бүгінде «Ульба-ТВС» кәсіпорны отын жинақтарын өндірудің жобалық қуатына толықтай шыққан.
