Шығыс Қазақстан облысында халық саны аз, инфрақұрылым тартылмай тозығы жеткен 20-дан астам ауыл таратылуы мүмкін. Бұл туралы облыстық экономика және бюджеттік жоспарлау басқармасы мәлімдеді, деп хабарлайды F16.kz.
Айта кетейік, Шығыста соңғы жылдары картадан мүлде жойылып кеткен ауылдар жетерлік. Мәселен, былтыр алты ауыл таратылса, соңғы он жылда 36 ауыл жойылған.
Кейбір ауылдарда халық саны 10-нан аз. Бұл тізімде Зайсан, Катонқарағай, Ұлан, Күршім және басқа аудандарға қарасты елді мекендер бар. Биыл 1 қаңтардағы жағдай бойынша облыста 50-ден аз адам тұратын 25 ауыл бар, — деп атап өтті басқарма өкілдері.
Деректерге сүйенсек, соңғы жылдары шекара маңындағы Тарбағатай, Катонқарағай және Күршім аудандарында қалаға қоныс аударғандар саны көп.
Ауыл мәртебесінің жойылуы халықты біржолата көшіру деген сөз емес. Шағын ауыл жақын маңдағы ірі елді мекендерге қосылады. Қажетті ұйымдарға автоматты түрде ауыстырылып, әлеуметтік қызмет көрсетіле береді.
Естеріңізге сала кетейік, бұған дейін Шығыс Қазақстанда бір жылда халық саны 3 мың адамға азайғанын жазған болатынбыз.
