Шығыс Қазақстан облысының әкімі Нұрымбет Сақтағановтың төрағалығымен өткен өңірлік инвестициялық штаб отырысында Жалпыұлттық инвестициялық пулды жаңарту және негізгі жобаларды сүйемелдеу мәселелері талқыланды.
Қазір пулда жалпы құны 106 млрд теңгеден асатын 62 жоба бар. Оның 18-і пайдалануға берілген. Барлық жобалар іске қосылғаннан кейін үш жыл бойы «бір терезе» қағидаты бойынша сүйемелденеді.
Өңір үшін басым бағыттар – өнеркәсіп, тау-кен металлургиясы және агроөнеркәсіп. Атап айтқанда, өнеркәсіп саласында 15 жоба (632,6 млрд теңге), агросалада 11 жоба (36,7 млрд теңге) жүзеге асырылып жатыр. Билік өкілдері жобалардың формалды іске қосылуымен шектелмей, нақты өнім шығару мен жұмыс орындарын ашуға басымдық берілетінін атап өтті.
Қазір шетелдік капитал салынған 44 жоба іске асырылып жатыр. Олардың ішінде Германия инвесторларының қатысуымен жүзеге асырылатын «Алатау Литий» ЖШС-ның литий өндіру және өңдеу жөніндегі тау-кен байыту комбинатының құрылысы, қытайлық инвестиция есебінен «Алтай Темір» ЖШС-ның Тишинск су қоймасын тазалау жобасы, Самар ауданындағы «Кузьмич» ЖШС-ның балық өсіру кешенін кеңейту жобасы және басқа да бастамалар.
Сонымен қатар инвестициялық пулға қосу үшін алты жаңа жоба қаралды. Олардың қатарында Глубокое ауданында мыс-мырыш кенін өндіру және өңдеу (Dengbo Success Minerals), «Харвест Қазақстан» ЖШС-нің суармалы жерлерді айналымға енгізу (35 млрд теңге), Өскемен қаласында «Aurora Residence» қонақүйінің құрылысы мен жаңа өндірістерді іске қосу, Ұлан ауданындағы «Самал Тау» ЖШС-нің балық шаруашылығы кешені және басқа да жобалар бар.
Дегенмен кейбір аудан мен қалаларда инвестициялық жобалардың әлі де жеткіліксіз екені айтылды.
ШҚО туризм басқармасының басшысы Ержан Сембинов биыл өңірге шамамен 70 инвестициялық жобаны тарту жоспарланып отырғанын жеткізді. Ол үшін барлық қала және аудан әкімдерінің, салалық басқарма басшыларының белсенді жұмыс істеуі қажет екені айтылды.
Облыс әкімі тапсырмасына сәйкес, инвестициялық штаб отырысы айына 1-2 рет өткізілетін болды.
