Жылдың алғашқы бес айында Шығыс Қазақстан облысында иммундаудан бас тартудың жүзден астам жағдайы тіркелген, деп хабарлайды F16.kz сайты.
ШҚО Санитариялық-эпидемиологиялық бақылау департаментінің мәліметінше, қазіргі уақытта екпеден бас тартқан азаматтармен кең көлемде түсіндіру жұмыстары жүргізіліп жатыр.
– Бұл бағыттағы жұмыстармен алғашқы медициналық-санитарлық көмек ұйымдары, яғни емханалар айналысады. Сонымен қатар екпеден бас тартқан азаматтардың қатысуымен дөңгелек үстелдер ұйымдастырылады. Иммундаудың пайдасы туралы ақпарат әлеуметтік желілер арқылы да кеңінен таратылуда. Түсіндіру жұмыстарына түрлі сала мамандары тартылып, тұрғындарға қажетті мәлімет жеткізілуде. Бұл бағытта оң нәтижелер бар, – деп хабарлады ШҚО СЭБД.
Ведомство өкілдерінің айтуынша, екпеден бас тартудың негізгі бөлігі азаматтардың жеке көзқарастары мен сенімдеріне байланысты. Сондай-ақ мұндай шешімдерге интернеттегі ресми емес ақпарат көздерінің әсері де айтарлықтай ықпал етіп отыр.
