Шығыс Қазақстаннан өзге өңірлерге қоныс аударатындар саны азаймай тұр. Кейінгі бес жылда облыста халық саны жыл сайын орта есеппен 2-3 мың адамға кеміген, деп хабарлайды F16.kz.
Көші-қон осы қарқынмен жалғаса берсе 2030 жылға қарай өңір тұрғындарының саны 26 мың адамға азаюы мүмкін. Бұл туралы облыс мәслихатының кезекті отырысында айтылды. Аймақ басшысы мәселенің негізгі себептері мен шешу жолына тоқталды.
Облыстағы солтүстік және оңтүстік аудандардың дамуы бірдей емес, Инфрақұрылымда және экономикалық құрылымдарда айырмашылық бар. Ол жалпы өңірдің біртұтас, үйлесімді дамуын тежейді. Шекаралық аудандарда (Марқакөл, Тарбағатай, Зайсан аудандары – ред.) халықтың азаюы кадр тапшылығына, статегиялық маңызды аумақтардың әлсіреуіне әкеледі, — деді ШҚО әкімі Нұрымбет Сақтағанов.
Жиын барысында өңірдің 2030 жылға дейінгі даму стратегиясы назарға алынып, бірқатар міндет қойылды.
Аймақ басшысы кері демографиялық үрдісті болдырмай, халыққа және экономикаға жаңа мүмкіндіктер туғызып, тұрақты әрі сапалы өсімді қамтамасыз ету қажеттігін атап өтті.
Стратегияда басты назар қалалар мен шекара маңындағы ауылдарды дамытуға аударылған.
Өскемен – халық санын 500 мыңға дейін ұлғайтуға мүмкіндігі бар хаб-қала және еліміздің Шығыс макроөңірінің орталығы болады деп жоспарланып отыр. Ол үшін тұрғын үйлер салып, әлеуметтік және көлік инфрақұрылымын жетілдіру, әуе қатынасын кеңейту және ірі қалалармен, көршілес мемлекеттермен теміржол қатынасын дамыту көзделген. Мәселен, Зайсан ауданында халық санын екі есе арттыруға, яғни 70 мыңға жеткізуге мүмкіндік бар. Бұл өңір туризмді дамыту, жаңа экономикалық мүмкіндіктерді пайдалану арқылы шекара маңы саясатының тірек нүктесіне айналады, — деді Нұрымбет Сақтағанов.
Стратегияда қамтылған негізгі тоғыз бағыттың бірі – ауыл шаруашылығын дамыту. Оның ішінде осы уақытқа дейін басымдық берілген ет пен сүт өндірісінің көлемін ұлғайтып, балық, ара және марал шаруашылығын қолға алу жоспарланған.
Халықты тұрғын үймен қамтамасыз ету – көші-қонды реттеудің бірден-бір жолы. Осы орайда құрылыс саласы да негізгі бағыттар қатарына кірген.
Алдағы 5 жылда толық инженерлік және әлеуметтік инфрақұрылымы бар 2 миллион шаршы метр тұрғын үй салуды жоспарлап отырмыз. Бұл өңір халқының санын арттыруға, құрылыс пен коммуналдық саланың дамуына серпін береді. Ең бастысы, бұл тұрғын үйлер табыс деңгейі жоғары емес азаматтарға қолжетімді болуы қажет, — деп атап өтті өңір басшысы.
Ал, орта мерзімді перспективада ауыл халқын жұмыспен қамту, туристік секторды дамыту және логистика жолға қойылған.
Марқакөл мен Зайсанда экотуризм мен ойын-сауық аймақтары, Риддер мен Алтайда тау және экстремалды туризм, Катонқарағайда сауықтыру туризмін дамыту жоспарда бар. Ауыл тұрғындарын табысты экономикалық салаға тарту олардың қалаларға көшуін тежейді, — деді облыс әкімі.
Сонымен қатар бұған дейін айтылып келген Риддерді Ресей арқылы Моңғолиямен байланыстыратын жол салу, Шанағатыдан Қытай Халық Республикасына жол ашу, Зайсан көлі жағасындағы Тұғыл ауылына дейін өзен қатынасын дамыту және Тұғылдан Майқапшағайға дейін теміржол тарту да өңірдің даму стратегиясына кірген.
