Еліміздің ең шығысындағы Аршаты ауылында еңбек етіп жүрген жас ұстаз Жалғас Болатханұлы жергілікті балаларға спорт пен тәрбие беріп қана қоймай, олардың өмірлік бағытын айқындауға үлес қосып келеді. Ол ұлттық құндылықтарды дәріптеп, жас ұрпақты салауатты өмір салтына баулуда ерекше белсенділік танытып жүр.
Ауыл баласының өмірі – табиғатпен біте қайнасқан, еңбекпен шыңдалған ерекше орта. Қаладағыдай гаджетке телмірмей, күнделікті тіршіліктің қайнаған ортасында өсетін ауыл баласы ерте есейіп, төзімділік пен қайсарлықты бойына сіңіреді. Осындай ортадан түлеп ұшқан жастардың қатарында бүгінде өзі де кейінгі буынға бағыт-бағдар беріп жүрген жас ұстаз Жалғас Болатханұлы бар.
Ол 1999 жылы Шығыс Қазақстан облысының шекара шебінде орналасқан Аршаты ауылында дүниеге келген. Алтайдың баурайындағы бұл өңірдің табиғаты көркем болғанымен, тұрмыс-тіршілігі оңай емес. Ұзақ қыс, қысқа жаз, жердің шалғайлығы – мұның бәрі жергілікті тұрғындардың мінезін шыңдап, еңбекқорлық пен табандылыққа тәрбиелейді.
Жалғас та осы ортада өсіп, бала кезінен еңбекке араласты. Бос уақытында спорт жарыстарды көріп, қазақ балуандарына жанкүйер болды. Бұл қызығушылық оны қазақ күресіне алып келді. Ауылдағы жаттықтырушы Асқарбек Бадисолтановтың жетекшілігімен жаттығып, түрлі жарыста олжа салған жас спортшының арманы биік болды.
Мектепті 2017 жылы аяқтаған соң ол Д.Серікбаев атындағы Шығыс Қазақстан техникалық университетіне оқуға түсіп, су ресурстары және су пайдалану мамандығын таңдады. Жоғары оқу орнында әскери кафедрада да білім алып, жан-жақты дамуға мән берді.
2021 жылы туған ауылына оралған ол мектептегі денешынықтыру пәнінің бос орнына орналасып, ұстаздық жолды таңдады. Кәсіби біліктілігін арттыру мақсатында Қазақстан-Американ еркін университетінде сырттай білім алып, 2024 жылы педагог дипломын иеленді.
Қазір Жалғас – ауыл балаларының сүйікті мұғалімі. Ол оқушыларының әрқайсына жеке көңіл бөліп, қабілетін ашуға барын салып келеді. Жас ұстаздың басты ұстанымы – шәкірттерін тек спортқа баулу емес, бірлікке, жауапкершілікке және өзара қолдауға тәрбиелеу. Сабақ барысында командалық рухты қалыптастыруға ерекше мән береді.
Жас ұстаздың жұмысына ауыл мектебіндегі заманауи спорт залы да қолайлы болып тұр. 2015 жылы аудан тумаларының қолдауымен салынған бұл нысан бүгінде оқушылардың спортпен жүйелі айналысуына мүмкіндік береді. Сонымен қатар демеушілер көмегімен түрлі спорттық құрал-жабдықтар сатып алынған.
Жалғас ұлттық спорт түрлерін дамытуға да айрықша көңіл бөледі. Асық ату, тоғызқұмалақ, қазақ күресі сабақтың ажырамас бөлігіне айналған. Оның шәкірттері аудандық жарыстарда жүлделі орындарға ие болып жүр. Мәселен, Ринат Зейнелханов пен Ерасыл Қасымқанов тоғызқұмалақтан, ал Балын Жомартқызы мен Жазира Изекова бес тас ойынында үздік нәтижелер көрсеткен.
Сонымен қатар ол алғашқы әскери даярлық және патриоттық тәрбие бағытында да белсенді жұмыс жүргізеді. Оқушылармен бірге тарихи тұлғаларды зерттеп, майдангерлер мен бітімгер сарбаздардың ерлігін насихаттауға үлес қосып келеді.
Мектептегі қызметімен қатар, Жалғас ауылдың қоғамдық өміріне де белсенді араласып, жастарға бағыт-бағдар беріп жүрген үлгілі азамат ретінде танылған.
Ринат Мұқатаев
