Патрульдік полиция батальонының қызметкерлері жол үстінде денсаулығы күрт нашарлап, инсульт белгілері байқалған ер адамға жедел көмек көрсетті, деп хабарлайды F16.kz Polisia.kz сайтына сілтеме жасап.
Өскемен – Риддер тасжолының 90-шақырымында патрульдік полиция батальонының қызметкерлері Азамат Олегұлы мен Әлішер Шаяхметов жол жиегіне тоқтаған автокөлікті байқаған. Көлік жүргізушісі салонда 38 жастағы азаматтың жағдайы нашарлағанын айтып, полицейлерден көмек сұраған.
Тәртіп сақшылары науқасты дереу қалаға дейін жеткізу туралы шешім қабылдаған.
Жолда науқас отырған көлік бұзылып, істен шығып қалған. Полицейлер бұл туралы ақпаратты дереу жақын маңдағы құрамында Асылбек Базылбеков пен Әлішер Ачилов бар ПА-466 экипажына хабарлады. Оқиға орнына жеткен екінші экипаж науқасты қызметтік автокөлікке отырғызып, барынша жылдам медициналық мекемеге жеткізді, — дейді ШҚО ПД баспасөз қызметі.
Екі экипаждың үйлесімді іс-қимылының арқасында азамат Өскемен қаласындағы №1 қалалық ауруханаға уақытылы жеткізіліп, оған қажетті медициналық көмек көрсетілді.
