23 маусым – Қазақстан Полициясы күніне орай Шығыс Қазақстан облыстық Полиция департаментінде салтанатты жиын өтті. Іс-шараға облыс әкімі Нұрымбет Сақтағанов қатысып, құқық қорғау органдары қызметкерлерін кәсіби мерекелерімен құттықтады, деп хабарлайды F16.kz сайты.
Өңір басшысы өз сөзінде полиция қызметінің қоғамдағы орны мен маңыздылығына тоқталып, азаматтардың қауіпсіздігі мен қоғамдық тәртіпті қамтамасыз етудегі тәртіп сақшыларының еңбегін жоғары бағалады.
– Қоғам тыныштығы мен азаматтардың қауіпсіздігін қамтамасыз ету жолында полиция қызметі әрқашан ең жауапты да абыройлы қызмет болып қала береді. Ол жоғары кәсібилікті, батылдық пен қайсарлықты ғана емес, заңға, әділдік пен өз халқына деген шексіз адалдықты талап етеді. Мемлекет басшысы Қасым-Жомарт Кемелұлы Тоқаев айқындап берген «Заң мен тәртіп» қағидатын берік орнатуда әрқайсыларыңыздың орындарыңыз ерекше. Баршаңызға зор денсаулық, отбасыларыңызға амандық, таусылмас қуат пен қажымас қайрат тілеймін. Отанға қызмет ету жолындағы абырой-жетістіктеріңіз арта берсін! Мереке құтты болсын! – деді Нұрымбет Сақтағанов.
Салтанатты шара барысында қызметтік міндеттерін үлгілі атқарып, жоғары нәтижелерге қол жеткізген полиция қызметкерлері марапатталды. Сонымен қатар құқық қорғау органының 10 қызметкеріне жаңа баспананың кілті табысталды.
Полиция күні қарсаңында облыс әкімі Полиция департаментіне арнайы барып, Жедел басқару орталығының жұмысымен танысқан болатын. Онда өңір тұрғындарының қауіпсіздігін қамтамасыз етуге бағытталған заманауи цифрлық шешімдер мен технологиялардың мүмкіндіктері көрсетілді.
Соңғы жылдары Шығыс Қазақстан облысында қоғамдық қауіпсіздік жүйесін цифрландыру бағытында ауқымды жұмыстар жүргізілуде. Қазіргі таңда өңірде 58 мыңнан астам бейнебақылау камерасы жұмыс істейді. Оның ішінде 22 мыңнан астам камера ішкі істер органдарының бірыңғай жүйесіне біріктірілген. Жыл басынан бері бейнебақылау құралдарының көмегімен 80 қылмыс ашылып, 9,6 мыңнан астам әкімшілік құқық бұзушылық анықталған.
Қоғамдық қауіпсіздікті қамтамасыз етуде жасанды интеллект технологияларының рөлі де артып келеді. Бүгінде облыс орталығында мыңнан астам аналитикалық модуль жұмыс істейді. Олар адамның бет-бейнесін автоматты түрде тануға, көлік құралдарын сәйкестендіруге, жол қозғалысы жағдайын талдауға, адамдар көп шоғырланған орындарды бақылауға және ықтимал қауіп-қатерлерді алдын ала анықтауға мүмкіндік береді.
Жедел басқару орталығында жол қауіпсіздігін қамтамасыз етуге және құқық бұзушылықтардың алдын алуға арналған заманауи цифрлық құралдар да таныстырылды. Олардың қатарында «Кибер-Шериф» мобильді кешендері, жол қозғалысы ережелерін бұзуды автоматты түрде тіркейтін жүйелер және іздеуде жүрген көліктерді нақты уақыт режимінде бақылауға мүмкіндік беретін цифрлық шешімдер бар.
Сонымен қатар облыс әкіміне төтенше және қауіпті жағдайларда қолданылатын арнайы техника көрсетілді. Атап айтқанда, робот-сапер, жаңа буындағы роботтандырылған мобильді платформа және ұшқышсыз ұшу аппараттарының мүмкіндіктері таныстырылды.
Осылайша өңірде құқық қорғау саласын цифрландыру мен материалдық-техникалық жарақтандыру жұмыстары қатар жүргізіліп, қоғамдық қауіпсіздікті қамтамасыз етудің тиімділігі артып келеді.
