Құқық қорғау органының беделін түсіретін теріс қылық жасағаны үшін Өскемен қаласы прокуратурасы бөлімінің прокуроры В.Пан қызметінен босатылып, “1-сыныпты заңгер» шенінен айырылды, деп хабарлайды F16.kz.
ШҚО прокуратурасы баспасөз қызметінің мәлімдеуінше, 2025 жылғы 3 қазандағы Әкімшілік құқық бұзушылық жөніндегі мамандандырылған соттың қаулысымен В.Пан ӘҚБтК-нің 608-бабы 3-бөлігінде көзделген әкімшілік құқық бұзушылық жасағаны үшін кінәлі деп танылып, 20 тәулікке әкімшілік қамауға алынды және 7 жыл мерзімге көлік құралын басқару құқығынан айырылды.
Құқық қорғау органының беделден түсіретін теріс қылық жасағаны үшін В.Пан «Құқық қорғау қызметі туралы» заңға сәйкес прокуратура органдарынан босатылып, «1-сыныпты заңгер» шенінен айырылды.
Естеріңізге сала кетсек, экс-прокурор В.Пан көлік жүргізіп келе жатып көшедегі жарық бағанына соғылған және оқиға орнынан қашып кетуге тырысқан. Дегенмен полиция қызметкерлері заң бұзушыны ұстап, тиісті тексеру жүргізді. Экспертиза нәтижесінде оның қан құрамында алкоголь мен марихуананың бар екені анықталған.
