Күні кеше елімізде санитариялық-эпидемиологиялық қызмет мамандарының кәсіби мерекесі аталып өтті. Айтулы мереке қарсаңында ШҚО әкімі Нұрымбет Сақтағанов саланы дамытуға елеулі үлес қосқан мамандарды құттықтап, құрмет көрсетті, деп хабарлайды F16.kz.
Қазіргі күні республика бойынша 12 мыңнан астам санитариялық-эпидемиологиялық қызмет маманы жұмыс істейді. Ал, облыс бойынша тағам өнімдері мен ауыз судың сапасын бақылап, жұқпалы және жұқпалы емес аурулардың алдын алу, эпидемиологиялық режимнің сақталуын қадағалайтын 163 маман еңбек етіп жатыр.
Сіздер таңдаған жол асқан жауапкершілікті, адалдық пен жоғары кәсіби шеберлікті талап етеді. Бұл сала – қоғам қауіпсіздігі мен халық денсаулығының кепілі. Сіздер жұқпалы індеттің алдын ала отырып, қауіпті ошақтарды бақылауда ұстайсыздар, азаматтардың амандығы үшін күндіз-түні аянбай еңбек етесіздер. Сол еңбектің арқасында өңірде санитариялық-эпидемиологиялық ахуал тұрақты сақталып, өмір сапасы да күн өткен сайын артып келеді. Әр отбасының амандығы, ел болашағы үшін жасап жатқан өлшеусіз еңбектеріңіз үшін алғыс айтамыз, — деді аймақ басшысы.
Шара барысында жылдар бойы елеулі еңбек етіп келе жатқан бірқатар маманға ҚР Премьер Министрінің, Денсаулық сақтау министрлігі мен облыс әкімінің Құрмет грамоталары табысталды.
Еңбегі еленгендер қатарында Назерке Шахантаева да бар. Ол бұл салаға азды-көпті 8 жылын арнаған. Алғаш дәрігер-эпидемиолог болып қадам басқан маман бүгінде ШҚО СЭБД тәуекелдерді мониторингілеу, талдау және бақылау бөлімінің басшысы болып қызмет етеді.
Біздің жұмыс әр салаға бөлінеді және әрқайсының ел өмірінде өзіндік маңызы бар. Жұқпалы және жұқпалы емес аурулардың алдын алу, су, ауа және өзге де қоғамға әсер ететін факторлардың сапасын бақылап, мониторинг жүргізу де біздің жұмыстың бір бөлігі. Эпидемиолог мамандары қызметінің маңызы әсіресе елді жайлаған коронавирус кезінде арта түсті. Мамандардың еңбегі бағаланып, кәсіби мерекеміз белгіленіп, осылай құрметке бөленіп жатқанымызға қуаныштымыз. Бұл біз үшін үлкен мәртебе, — дейді ол.
Эпидемиологиялық жағдайды тұрақтандыру жолында аянбай еңбек етіп жүрген мамандардың мерекесі биылдан бастап 15 қыркүйекке белгіленді.
