Шығыс Қазақстан облысы аумағында қазақ тарихындағы даңқты тұлғалардың бірі Ер Жәнібек есімін ұлықтауға арналған семсерлесуден XX республикалық турнир өтіп жатыр. Дәстүрлі спорт додасы еліміздің түкпір-түкпірінен келген жас спортшылардың басын қосып, жас таланттардың шеберлігін шыңдайтын маңызды алаңа болды, деп хабарлайды F16.kz.
Аашық турнир облыс орталығы – Өскемен қаласының Ольга Рыпакова атындағы жеңіл атлетика орталығы базасында ұйымдастырылған. Жарысқа қатысушылар семсерлесудің рапира және шпага түрлерінен өзара мықтыны анықтап жатыр. Ұлдар мен қыздар жеке-жеке сынға түсіп, жоғары деңгейдегі дайындықтарын көрсетеді.
Көп жылдан бері ұйымдастырылып келе жатқан турнир алғашында қалалық деңгейде өткізілсе, бүгінде республикалық маңызы бар ірі спорттық шаралардың біріне айналды. Биылғы додаға Қазақстанның алты өңірінен келген 295 спортшы қатысуда. Сонымен қатар жарысқа Қырғызстан құрамасының спортшылары да шақырылып, турнирдің халықаралық деңгейдегі беделін арттыра түсті.
Айта кету керек, турнирді ұйымдастыруға облыстық денешынықтыру және спорт басқармасы мен Семсерлесу федерациясы мұрындық болды. Ал жарысты өткізу бастамасын Ер Жәнібек батырдың ұрпақтары көтерген. Бұл бастама ұлт тарихындағы бірегей тұлғаның есімін жас ұрпаққа дәріптеп, спорт арқылы патриоттық рухты нығайтуды мақсат етеді.
Турнирдің ашылу салтанатына ШҚО әкімі Нұрымбет Сақтағанов қатысып, жас спортшыларға сәттілік тіледі. Аймақ басшысы мұндай жарыстар жасөспірімдердің спорттық шеберлігін шыңдап қана қоймай, олардың бойында тәртіп, жауапкершілік және ел тарихына деген құрмет сезімін қалыптастыруда маңызды рөл атқаратынын атап өтті.
Осындай турнирлер тек жаңа спортшылардың есімін әйгілеп қоймай, олардың бойына тәртіп, жауапкершілік және ел тарихына деген құрмет сезімін қалыптастырады. Көптеген қатысушы үшін бұл жарыс үлкен жетістіктерге жол ашатын алғашқы қадам болады деп сенемін, – деді облыс әкімі.
Шығыстың бас қаласындағы дүбірлі бәсеке бүгін түйінделеді. Ұйымдастырушылардың айтуынша, турнир алдағы уақытта да жас семсерлесушілердің кәсіби деңгейін көтеріп, өңірдегі спорттың дамуына серпін беретін маңызды алаң болып қала бермек.
