Шығыс Қазақстан облысында «Жаңа Конституция – Әділетті Қазақстанның берік негізі» тақырыбында дөңгелек үстел ұйымдастырылды. Іс-шараға облыс әкімі Нұрымбет Сақтағанов, мемлекеттік органдардың өкілдері, жоғары оқу орындарының ғалымдары, сарапшылар және азаматтық қоғам институттарының мүшелері қатысты.
Жиын барысында Конституцияның қоғам өміріндегі рөлі, елімізде жүргізілген конституциялық реформалардың нәтижелері, құқықтық мемлекетті нығайту және азаматтардың мемлекеттік басқаруға қатысу мүмкіндіктерін кеңейту мәселелері талқыланды.
Облыс әкімі Нұрымбет Сақтағанов өз сөзінде Ата Заңның ел дамуы үшін маңыздылығына тоқталды.
– Бүгін біз ел тарихындағы аса маңызды оқиға – жаңа Халық Конституциясы ресми күшіне енетін жауапты кезеңде оның қоғам өміріндегі орны мен маңызын талқылап, пікір алмасу үшін сарапшылар алаңында арнайы бас қосып отырмыз. Ата Заң – мемлекетіміздің ұзақ мерзімді даму бағытын айқындайтын, тәуелсіздігіміздің тұғырын бекемдеп, азаматтардың құқықтары мен бостандықтарына кепілдік беретін басты құқықтық құжат. Қоғам сұранысы мен заман талаптарына сай жүргізілген конституциялық реформалар еліміздің құқықтық жүйесін жетілдіруге, мемлекеттік басқаруды жаңғыртуға, азаматтардың мемлекеттік басқару ісіне қатысу мүмкіндіктерін кеңейтуге және демократиялық институттарды нығайтуға бағытталды, – деді өңір басшысы.
Сондай-ақ ол Конституция қағидаттарын тиімді жүзеге асыру мемлекеттік органдармен қатар азаматтық қоғам институттарының, үкіметтік емес ұйымдардың, сарапшылар қауымдастығының және әрбір азаматтың ортақ міндеті екенін атап өтті.
Дөңгелек үстелде Конституцияның негізгі қағидаттарын іске асыру тетіктері мен құқықтық жүйені одан әрі жетілдіру мәселелері жан-жақты қарастырылды.
Қазақ-Америка еркін университетінің ғылыми жұмыстар және жоғары оқу орнынан кейінгі білім беру жөніндегі проректоры, қауымдастырылған профессор Юлия Гаврилова «Ұлттық құқықтық жүйені дамытудың негізгі жаңашылдықтары мен келешегі» тақырыбында баяндама жасады.
Ал С.Аманжолов атындағы Шығыс Қазақстан университетінің профессоры, заң ғылымдарының кандидаты Гүлмира Баиркенова Конституцияда бекітілген заң алдындағы теңдік қағидаты мен азаматтардың құқықтары мен бостандықтарын қорғаудың құқықтық тетіктеріне тоқталды.
Іс-шара барысында басқа да сарапшылар сөз сөйлеп, Жаңа Конституцияның құқықтық мемлекет құрудағы рөлі, азаматтық қоғамның дамуы және құқықтық мәдениетті қалыптастыру мәселелері бойынша пікір алмасты.
