Глубокое ауданының Уварово ауылында есірткі зертханасын ұйымдастырған екі латвиялық азамат ұсталды, деп хабарлайды F16.kz.
Белгілі болғандай, мефедрон-меткатинон психотроптық затының аналогын өндіретін жерасты зертханасы жұмысын өткен жылы бастаған. Балтық елінің екі азаматы алдымен Өскеменге ұшып келіп, артынша ауылдағы жасырын зертханасы бар үйге орналасады. Химиялық заттар жеткізілген соң мессенджер арқылы кураторларымен хат алмаса отырып, мефедрон өндірісін бастаған.
Былтыр шілде айында 125 келіден астам мефедрон жасалған. Айыпталушылар арнайы операция нәтижесінде қолға түсті. Тінту барысында химиялық реагенттер, жабдықтар мен дайын мефедрон тәркіленді. Сараптамалар заттардың құрамын және олардың психотроптардың тыйым салынған аналогтарына сәйкестігін растады, — дейді қылмыстық істер жөніндегі мамандандырылған ауданаралық соты.
Сотта айыпталушылар кінәларын мойындап, негізгі мақсат – қосымша ақша табу болғанын айтқан. Алайда, соттта олардың саналы түрде және ұйымдасқан топтың құрамында әрекет еткендіктері дәлелденді. Нәтижесінде айыпталушылардың кінәсі толық дәлелденіп, 11 жыл бас бостандығынан айырылу жазасы берілді.
