Аймақ басшысы Нұрымбет Сақтағанов күрделі жөндеу жүргізіліп жатқан Шығыс Қазақстан облыстық мамандандырылған медициналық орталығында болды, деп хабарлайды F16.kz.
Қазір мұнда желдету жүйесі, инженерлік желілер және электр жүйесі жаңартылып, урология бөлімшесі мен стационар ғимараты күрделі жөндеуден өтті.
Сондай-ақ «Қазцинк» компаниясының қолдауымен гинекология бөлімі де жөнделіп, қазіргі заман талабына сай жаңғыртылды.
Медициналық қызмет сапасын арттыру мақсатында заманауи видеоэндоскопиялық жүйелер мен компьютерлік томограф сияқты озық медициналық құрал-жабдықтар сатып алынып жатыр. Жергілікті бюджет есебінен 50 млн теңге бөлініп, урология, гинекология және травматология бөлімшелері 100 төсек-орынмен қамтамасыз етілді. Бұл жұмыстар пациенттерге көрсетілетін қызмет сапасын айтарлықтай жақсартып, дәрігерлердің өз міндетін тиімді атқаруына мүмкіндік береді деп сенемін, – деді облыс әкімі.
Өңір басшысы облыстың денсаулық сақтау саласын дамытуға алдағы уақытта да баса назар аударылатынын атап өтті.
Айта кетейік, орталықтағы жөндеу жұмыстары келер жылдың бірінші тоқсанында аяқталуға тиіс.
