Шығыс Қазақстан облысында сел жүру қаупі жоғары кезең басталды, деп хабарлайды F16.kz тілшісі.
Облыс бойынша барлығы 13 учаскеде сел жүру қаупі бар. Олар Катонқарағай, Зайсан, Алтай аудандарында және Риддер қаласында орналасқан.
ШҚО төтенше жағдайлар департаменті таратқан ақпаратқа сүйенсек, аталған аудандарда таудың жоғары жақтарында 11 елді мекенге қауіп төндіретін 144 мореналық көл пайда болған. «Қазселденқорғау» ММ мамандары көлдердің жай-күйін бақылап отырады.
Сонымен қатар 9 учаскеде, атап айтқанда Громотуха және Уба – Риддер, Бұқтырма, Хамир, Черновая – Алтай ауданы, Бұқтырма – Катонқарағай ауданы, Кендірлік – Зайсан ауданында көшкін қаупі бар.
Сел мен көшкін жағдайына мониторинг жүргізу үшін 9 маусымдық гидропост және жыл бойы жұмыс істейтін 1 гидропост орнатылған.
ШҚО ТЖД және «Қазселденқорғау» ММ ШҚО филиалының мамандары тұрғындарға сел, көшкін жүру қаупі жоғары кезеңде тауға шығуға болмайтынын ескертеді.
Фото: ШҚО әкімінің баспасөз қызметі
