Қазақстан цифрлық тәуелсіздікті стратегиялық мақсат ретінде айқындап, жасанды интеллект технологияларын белсенді түрде дамытып жатыр. Былтыр 2029 жылға дейінгі ЖИ-ді дамыту тұжырымдамасы бекітілді. Бұл құжат ауқымды міндеттерді алға қояды, деп хабарлайды F16.kz.
Атап айтқанда, бес жылда миллион адамды ЖИ негіздеріне үйрету, ұлттық платформа құру, өзіміздің тілдік моделі — KazLLM-ды әзірлеу және отандық IT-контенттің үлесін 80%-ға дейін жеткізу.
Бұл туралы Шығыс Қазақстан облысының цифрландыру және архивтер басқармасы басшысының орынбасары Арнұр Сапарғалиев өңірлік коммуникациялар қызметі алаңында мәлім етті.
Жасанды интеллект қазірдің өзінде медицина, көлік және мемлекеттік қызмет салаларында қолданыла бастады. CerebraAI және MED365 шешімдері дәрігерлерге диагноз қоюда көмектеседі, ал «ҚТЖ» базасында пойыз қозғалысын оңтайландыру үшін цифрлық полигондар құрылып жатыр. Қоғамдық қауіпсіздік саласында «OPER 2.0» бейнеаналитика жүйесі енгізілді, ал eGov аясында интеллектуалды чат-бот әзірленіп жатыр.
Елде Cybernet AI, Verigram, Webtotem секілді компанияларды біріктіретін тұтас ЖИ экожүйесі қалыптасып келеді. Alem.AI халықаралық орталығы салынып жатыр, ол зерттеулер мен стартаптарға арналған алаңға айналмақ. Қазақстан университеттері де бұл саланың дамуына белсене атсалысып отыр.
Цифрлық тәуелсіздіктің ажырамас бөлігі — киберқауіпсіздік. Қазақстан ITU-дің жаһандық индексіндегі позициясын жақсартты, KZ-CERT орталығы жұмыс істейді, «Киберқалқан Қазақстан» тұжырымдамасы жүзеге асырылып, цифрлық кодекс пен ЖИ туралы заңдар дайындалып жатыр.
Инфрақұрылымды дамытуға, оның ішінде деректерді өңдеу орталықтарына ерекше көңіл бөлінген. Сондай-ақ ЖИ-ды жастар мен бизнес арасында ілгерілетуге басымдық берілмек. Осы бастамалар арқылы Қазақстан Орталық Азияның цифрлық хабы ретінде өз позициясын нығайтып, технологиялық егемендікке нақты қадамдар жасады.
Фото: ШҚО өңірлік коммуникациялар қызметі
