Өскемен-Риддер республикалық тас жолында қауіпсіздікті қамтамасыз ету үшін көліктерге әуеден бақылау жүргізіледі, деп хабарлайды F16.kz.
Шығыс Қазақстан облысы аумағында өтіп жатқан «Қауіпсіз жол» жедел-алдын алу шарасы кезінде жол полициясы «Кибершериф» кешені мен ұшқышсыз ұшу аппараттарын қолданады.
Дрондар жол қозғалысы ережесін бұзған жүргізушіні әуеден анықтауға мүмкіндік береді, содан кейін жақын маңдағы патруль оған тиісті шара қолданады. «Кибершериф» кешені бейнежазбаны жүзеге асырады, қозғалыс жылдамдығын өлшейді, мемлекеттік тіркеу нөмірлерін алыстан да таниды және іздеуде жүрген автомобильдерді анықтайды, – деп жазды ШҚО полиция департаментінің баспасөз қызметі.
Рейд барысында Өскемен—Риддер тас жолында ұшқышсыз ұшу аппараты арқылы тыйым салынған жерде көлікті басып озу кезінде қарсы бағытқа шығып кеткен екі жағдайды анықтады. Жол қозғалысы ережесін бұзған Haval және Subaru автокөліктерінің жүргізушілері жауапкершілікке тартылды.
Екі жүргізушіге қатысты әкімшілік хаттама толтырылып, материалдар сотқа берілді. Құқық бұзушылар 6 ай мерзімге жүргізуші куәлігінен айырылуы мүмкін, — деп толықтырды департаменттің баспасөз қызметі.
Фото: ШҚО ПД/видеодан алынған кадр
