Шығыс Қазақстан облысында көктемгі дала жұмыстары қарқынды жүргізіліп жатыр, деп хабарлайды F16.kz.
Қазір өңірде 436,1 мың гектар жерге егін егіліп, жалпы жоспардың 70%-ы орындалды. Былтырғы кезеңмен салыстырғанда бұл айтарлықтай жоғары (320 мың га немесе 52,8%) көрсеткіш.
Биыл облыста тұқым себілетін егістік көлемі 618,1 мың гектарға жетеді. Оның ішінде дәнді дақылдар 252,6 мың га, майлы дақылдар 224,5 мың га (207 мың га – күнбағыс) алқапқа егіледі. Сондай-ақ картоп пен қарақұмық өсірілетін аумақ та ұлғайған.
Егісте GPS-навигация және қашықтан басқарылатын жаңа техникалар қолданылып, өнімділік артып, шығын азайды. Мұндай кешендер бір күнде 100-150 гектар алқапты өңдеуге мүмкіндік береді.
Жанар-жағармай мен тыңайтқыштар да уақытында жеткізіліп жатыр. Бүгінге дейін төмендетілген бағадағы 15,5 мың тонна дизель жеткізілсе, 44,2 мың тонна тыңайтқышқа келісім жасалған, 40 мың тоннасы әкелінген.
Қаржылай қолдауға келсек, «Кең дала 2» бағдарламасы бойынша 96 шаруашылыққа 7,3 млрд теңге несие берілді, «Ертіс» ӘКК арқылы қосымша 5,9 млрд теңге бөлінді, 5,1 млрд теңге көлеміндегі субсидия тыңайтқыш, пестицид пен суармалы суға бөлініп отыр.
Фото: pixabay.com
