Бүгін цифрлық даму, инновациялар және аэроғарыш өнеркәсібі вице-министрі Ростислав Коняшкин шығысқазақстандықтармен кездесіп, толғандырған сұрақтарына жауап берді, деп хабарлайды F16.kz тілшісі.
Өңір тұрғындарын алаңдатқан мәселенің бірі – сапасыз интернет пен ұялы байланыстың жоқтығы. Әсіресе кейбір шағын ауылдарда және жол бойында байланысқа шығу тіпті мүмкін емес.
Вице-министр тұрғындарды алаңдатқан бұл мәселе алдағы жылы шешімін табатынын жеткізді.
![\"\"](\"https://f16.kz/uploads/posts/2025-05/8483fcc6-8ff5-41c4-bfd1-f4da19210c19.jpg\")
Қазір республикалық маңызы бар жолдарға басымдық беріп жатырмыз. Жолдарды аралап, ұялы байланыс ең нашар ұстайтын жерлерді анықтадық. Жергілікті әкімдік инвесторлармен және ұялы байланыс операторларымен бірлесіп, интернет тартатын антенна-діңгектерді орнату жұмысын былтыр бастап кеткен. Ендігі кезек – жергілікті маңызы бар жолдарда. Бұл жұмыстар биыл басталды. Келер жылдың соңына дейін жол бойындағы ұялы байланысты жақсартуға тырысамыз, – деді Ростислав Коняшкин.
Сондай-ақ вице-министр өз сөзінде аталмыш жоба тас жолдың бойында интернет желісін еркін пайдалана алмаса да телефонмен байланысқа шығуға мүмкіндік беретінін атап өтті.
Біздің мақсат – жол бойында кем дегенде қоңырау шалуға және қарапайым мессенджерлерді қолдануға мүмкіндік беру. Өте жоғары сападағы интернет болатынына кепілдік бере алмаймын. Десе де, ең негізгі қажеттіліктерді қамтамасыз етуге тырысамыз, – деді ол.
Фото: F16.kz; жасанды интеллект
