Қазақстанның бірнеше өңірінде құмар ойын орталықтары салынуы мүмкін. Бұл туралы туризм және спорт министрі Ербол Мырзабосынов мәлім етті, деп хабарлайды F16.kz.
Елімізде туризм саласын дамытуға бағытталған жаңа қадам жасалмақ. Жуықта Мәжіліс туристік қызмет туралы заңға енгізілген түзетулерді екінші оқылымда мақұлдады. Құжатта еліміздегі бірқатар өңірінде ойын бизнесін дамыту мүмкіндігі қарастырылған.
Жаңа өзгерістерге сәйкес, бұған дейін тек Бурабай мен Қапшағайда ғана рұқсат етілген казинолар енді басқа да аймақтарда да ашылуы ықтимал. Атап айтқанда, Маңғыстау облысындағы Каспий теңізі жағалауы, Панфилов ауданындағы Алакөл маңы, сондай-ақ Жетісу, Алматы және Шығыс Қазақстан облыстары осы тізімге енген.
Әр жаңа казино 2-3 млрд теңге көлемінде салық төлейді әрі шамамен 500 жұмыс орнын ашады. Бұл – туризмді дамыту мақсатында жасалып отырған халықаралық тәжірибе. Салықты азайту туралы айтылып жатқан жоқ. Өздеріңізге мәлім, казинода әрбір ойын үстелінен салық төленеді, – деп түсіндірді министр.
Сала өкілдерінің айтуынша, бұл тәсіл туризмді жандандыру үшін көптеген елде қолданылып жүрген халықаралық тәжірибеге негізделген.
Маңызды шарттардың бірі – бұл ойын мекемелерінде тек шетелдік туристерге ғана бәс тігуге рұқсат беріледі. Осылайша, билік өкілдері ойын бизнесін дамыту арқылы елге келетін туристер санын арттырып, экономикаға қосымша кіріс көзін қалыптастыруды көздеп отыр.
