Қазақстанның бастамасымен Біріккен Ұлттар Ұйымы 2026 жылды Халықаралық волонтерлер жылы деп жариялады. Бұл шешім «Мейірімді Қазақстан» идеясының мазмұнымен толық үндеседі.
Шығыс Қазақстан облысында басталған «Мейірімді Шығыс» қайырымдылық волонтерлік акциясы еліміздің өзге өңірлерінде де қолдау тауып, игілікті іс республика көлемінде ұйымдастырылды.
Іс-шараның негізгі идеясы — қоғамды қайырымдылық пен бір-бірін қолдауға шақыру, осы құндылықтар төңірегінде біріктіру, азаматтардың әлеуметтік жауапкершілігін арттыру және оларды игі істерге жұмылдыру, — дейді ұйымдастырушылар.
Акция аясында он күн бойы республика аумағында жастар ұйымдарының белсенділері мен волонтерлері әлеуметтік маңызы бар көп жұмыс атқарды. Атап айтқанда, жалғыз тұратын зейнеткерлердің ауласын қардан тазалады, қарттар үйі мен балалар үйіне көмек көрсетті, коммуналдық қызметкерлерге ыстық шай мен ас-ауқат таратты, сондай-ақ көлігі бар азаматтардың қолдауымен аялдамада тұрған тұрғындарды үйіне дейін жеткізу шаралары ұйымдастырылды.
Жас кәсіпкерлердің демеушілігімен тұрмысы төмен отбасыларға азық-түлік себеттері таратылып, медициналық мекемелерде қан тапсыру акциясы өткізілді. Акцияның әр күні белгілі бір тақырыпқа арналып, барлығы 10 мыңға жуық қазақстандықты қамтыды.
Жаңа жыл мерекесі қарсаңында Ұлы Отан соғысының ардагерлері мен тыл еңбеккерлеріне құрмет көрсетіліп, сый-сияпаттар табысталды.
«Мейірімді Қазақстан» республикалық қайырымдылық акциясы өңірлерде түрлі әлеуметтік топтарды қамтып, нақты әрі жүйелі қолдау көрсетуге мүмкіндік берді.
Өздеріңіз білесіздер, биыл Халықаралық волонтерлер жылы кең көлемде аталып өтіп жатыр. «Мейірімді Қазақстан» акциясының жалпыхалықтық қолдауға ие болуы қуантады. Мемлекет басшысы Turkistan газетіне берген сұхбатында қайырымдылықпен айналысып жүрген азаматтарды қолдау мақсатында «Мейірім» орденін енгізу туралы айтты. Бұл игі іспен айналысатын жандардың қоғам алдындағы абырой-беделі мен мәртебесін айқындайды, — деді ШҚО волонтерлік фронт-офисінің жетекшісі Айдос Әділбеков.
Ұйымдастырушылардың айтуынша, қайырымдылық шарасы 1 наурызға дейін жалғасады.
