Шығыс Қазақстан облысының жеті мектебінде жасанды интеллектіні оқыту және ойын әзірлеу бойынша пилоттық жоба іске асырыла бастады. Сөйтіп бұл өңір оқушыларды жасанды интеллект пен гейм-девелопмент дағдыларына үйрету бойынша пилоттық білім беру жобасы енгізілетін еліміздегі алғашқы өңірлерінің бірі атанбақ.
Мұндай жағымды жаңалықты облыстың білім басқармасы таратты. Басқарманың ақпаратына сүйенсек, 2025 жылдың басынан бері қолға алынған арнайы курстарда қазір 10-сыныптың 319 оқушысы оқып жатыр
300 ПЕДАГОГ ДАЯРЛЫҚТАН ӨТЕДІ
Жоба Президент тапсырмасы аясында жүзеге асырылып, онлайн білім беру платформасына негізделген edu.astanahub.com Astana Hub халықаралық технопаркінің қатысуымен іске қосылды. Платформа бүкіл ел бойынша оқушылар арасында цифрлық құзыреттілікті дамытуға бағытталған. Сонымен қатар «Жасанды интеллект» және «Ойындарды дамыту» бағыттарында 300 педагогты даярлау басталды. Бұл мектептерде курстарды тұрақты жүргізуге негіз болды.
Шығыс Қазақстанда жобаға жеті білім беру мекемесі қатысады, олардың мұғалімдері онлайн оқытудан сәтті өтіп, биылғы қаңтар айынан жұмысты бастапк етті. Оқушылардың жалпы саны – 319, оның ішінде 143 оқушы AI бағытын, 176 оқушы компьютерлік ойындарды әзірлеу негіздерін таңдаған.
Ең бастысы, курстар мектептің оқу жоспарына ресми түрде енгізілген. Сонымен, оқу бағдарламасына «Жасанды интеллектіге кіріспе және үлкен деректер» және «Ойындарды әзірлеу негіздері» пәндері қосылды, оларға вариативті компонент аясында қосымша сағаттар бөлінді. Бұл – уақытша науқан емес, жүйелі жұмыс.
ЖАҢА ПӘННІҢ ЕРЕКШЕЛІГІ НЕДЕ?
Жаңа пәндердің ерекшелігі – пәнаралық. Бағдарламаға бағдарламалау, цифрлық дизайн, анимация, пайдаланушы психологиясы, жобаларды басқару және кәсіпкерлік негіздері кіреді. Оқытудың мұндай кешенді моделі технологияларды оқып қана қоймай, оқушылардың сыни және креативті ойлауын қалыптастыруға, сондай-ақ командалық жұмыс дағдысын дамытуға мүмкіндік береді. Оқушылар болашақта мамандарға қойылатын негізгі талаптарды меңгереді.
Жоба цифрлық трансформацияның іс жүзінде қазақстандық орта білім беру жүйесіне енгізілуінің алғашқы ауқымды мысалдарының бірі болды. Бастама сынақтан сәтті өткен жағдайда оны еліміздің басқа аймақтарында қолданысқа енгізу көзделген. Сөйтіп мектеп қабырғасынан мамандардың жаңа буынын даярлап шығаруға жол ашылады.
Шығыс Қазақстанда бұл бастама цифрлық білім берудің өңірлік экожүйесін құруға негіз бола алады, әсіресе жастар арасында IT-салаға деген қызығушылықтың артуын және экономиканы цифрландыру жөніндегі міндеттерді ескерсек жобаның ғұмыры ұзақ боларына сенім мол.
