Кейінгі кезде Өскеменде жарық жиі сөнетін болды және ол туралы жауапты орындар халықты алдында ала құлақтандырмайды. Адамдар “тоқсаныншы жылдарға қайта оралдық па?” деп алаңдайды. Бұл мәселеге байланысты Каменный Карьер кентінің тұрғындары жиылып, жергілікті билік пен прокуратураға шағым жазды, деп хабарлайды F16.kz.
ҚАЛАДАҒЫЛАР ДА ҚАРЫҚ БОП ОТЫРҒАН ЖОҚ
Жалп етіп жарық сөніп қалуы облыс оталығында және оның іргесіндегі елді мекендерде қалыпты жағдайға айналғандай. Қаланың әр ауданында, атап айтқанда Жібек маталар комбинаты ауданы, Күленов кенті, 23-ші, 22-ші, 20-шы шағын аудандар, Гавань ауданы, Согра кенті, орталықтағы Михаэлис, Космический және басқа да көшелерде электр қуаты жиі болмай қалады. Ең сорақысы электрмен қамтамасыз етуші компаниялар бұл келеңсіздік туралы алдын ала ескертіп, тұрғындарды хабардар етпейді. Сондықтан пәтер иелері кооперативі мен мүлік иелері бірлестігі де ештеңе білмейді. Осындай кезде қарапайым жұрт азан-қазан болып шулап қалады.
Өткенде Күленов кентінде 12 сағат бойы жарық пен суық су болмады. Таңғы сағат 9 шамасында өшкен, кешкі 10-ға қарай бірақ қосылды. Мүлік иелері бірлестігінің төрағасы да, жергілікті өзін-өзі басқару комитетіндегілер де не болғанын, жарық пен судың қашан берілетінін білмейді. Біздің үйде қарт адам бар, жүре алмайды. Жарық әне қосылады, міне қосылады деп кешке дейін күттік. Ақыры қарияның ас суын әзірлеп әкелу үшін Жібек жолындағы туысымыздың үйіне баруға тура келді, – деді Айша Дүйімбаева.
УӘДЕ ҚАШАН ОРЫНДАЛАДЫ?
Жуықта Өскемен іргесіндегі Каменный Карьер кентінің тұрғындары жиылып, электр мәселесін тағы да көтерді. Жергілікті атқарушы билікке, прокуратураға шағым жазып, әлеуметтік желіде бейнеүндеу жариялады.
Олардың айтуынша, жарықтың қайта-қайта өшуінен үйдегі электр техникалары күйіп, тоңазытқыштағы азық-түлігі бұзыла бастаған. Әсіресе, жаздың аптап ыстығында тоңазытқышсыз қиын.
Жарық күн сайын сөнеді. Тіпті бар болған күннің өзінде электр қуаты аз. Соның салдарынан үйдегі техникалар істен шығып, жарамсыз боп қалды. Біз бұл проблеманы айтып бірнеше рет жауапты орындарға хабарластық. Ауылда жиын өткіздік. Ушанов ауылдық округінің (Глубокое ауд. – ред.) бұрынғы әкімі, ШҚ АЭК өкілдері келді, мәселені шешуге уәде берді. Бірақ әлі күнге ешқандай нәтиже шықпады, – деді Каменный Карьер кентінің тұрғындары.
Жергілікті халықтың айтуынша, электр қуатымен қамтушы компания жарықтың сөнуі жөндеу жұмыстарымен байланысты деп түсіндірген. Бірақ көпшілік бұған сенбейді.
Қашанғы жөндеуге болады?! Біз ондай уәжге сенбейміз. Өйткені жөндеудің нәтижесін көрмедік, күн өткен сайын нашарлап барады. Тоқтың кернеуі әлсіз және тұрақсыз. Кернеу бірде жоғарылап, бірде төмендеп ауытқып тұрғандықтан электр құрылғыларымыз істен шығып қалады. Оның бәрін кім қалпына келтіреді. Бәрі күйіп кетті, енді адамдар өртенсін деп отыр ма?! – деп күйінді екінші бір ауыл тұрғыны.
