Өскемендегі қылмыстық-атқару жүйесіне қарасты мекемелердің бірінде күзетте тұрған әскери қызметкер мылтық атуға мәжбүр болды, деп хабарлайды F16.kz.
«Шығыс» өңірлік қолбасшылығы баспасөз қызметінің мәлімдеуінше, кезекшілік кезінде белгісіз біреулер қоршауға жақындап, ішке қарай бір заттарды лақтырған. Оның бірнешеуі тұтқындар жүрген аумаққа, енді біреуі техникалық аймаққа түскен. Ал біреуі қоршаудың сымына ілініп қалған. Осы кезде сотталғандар қоршау сымына ілініп қалған затты алу үшін тыйым салынған аумаққа өтіп кеткен. Мұны байқап қалған 6699 әскери бөлімінің әскери қызметшісі дереу ескерту жасап: «Тоқта! Кері қайт!» деп айғайлайды. Алайда сотталғандар ескертуге құлақ аспаған. Әскери қызметші жағдайды жедел түрде қарауыл бастығына рация арқылы хабарлап, іле-шала тағы да: «Тоқта, кері қайт! Тоқта, атамын!» деп ескерту жасайды. Сол сәтте олардың бірі қоршауға өрмелеп шыға бастаған. Қауіпсіздік нұсқаулығы бойынша бұл – аса қауіпті қадам, себебі мұндай әрекет қашуға немесе жаппай тәртіп бұзуға алып келуі мүмкін.
Осыған байланысты әскери қызметші ішкі тәртіп ережелерін басшылыққа ала отырып аспанға ескерту оғын атқан. Қарудың дауысын естіген сотталғандар кілт тоқтаған. Қазір жағдай толық бақылауда, ешкім зардап шеккен жоқ. Ал қырағылық көрсеткен әскери қызметшіге Ұлттық ұлан басшылығы 10 тәулік демалыс берді.
