Ағымдағы жылдың бес айында елімізде құқықтары бұзылған тұтынушыларға 881,3 миллион теңге қайтарылды, деп хабарлайды F16.kz тілшісі.
Биылғы қаңтар мен мамыр айлары аралығында Қазақстан Республикасы Сауда және интеграция министрлігі Тұтынушылардың құқықтарын қорғау комитеті мен оның аумақтық департаменттері азаматтарға тауарлар, қызметтер мен жылжымайтын мүлік сатып алу барысында құқықтық көмек көрсетіп, олардың бұзылған құқықтарын қалпына келтіру бағытында ауқымды жұмыс жүргізген. Осы аралықта тұтынушылардың шағымдары бойынша жалпы сомасы 881,3 миллион теңгеден асатын қаражат қайтарылған.
– Шағымдар көбінесе сапасыз тауарлар (автокөліктер, косметика, ұялы телефондар), орындалмаған қызметтер (шипажай жолдамалары, қоғамдық тамақтану, фитнес, туризм), сондай-ақ рәсімделмеген немесе уақтылы берілмеген жылжымайтын мүлікке қатысты болды, – деп хабарлайды Сауда және интеграция министрлігінен.
Бір қызығы, азаматтарға нақты көмек көрсетілген мысалдар арасында Алматы қаласында тұтынушы 215 миллион теңгеге сатып алған, бірақ үшінші тұлғаға сатылып кеткен жылжымайтын мүлік объектісіне қатысты дау мен 700 теңге тұратын сапасыз ойыншыққа қатысты өтемақы талап ету сияқты фактілер де болыпты. Бұл даудың барлығы департамент мамандарының араласуымен оң шешімін тапқан.
– Аталмыш деректер – жай статистика емес. Әрбір өтініштің артында нақты тағдыр, үміт пен әділеттілікке деген сенім жатыр. Қазақстандықтар өз құқықтарын қорғауда белсенділік танытып келеді. Біз осы үрдісті жоғары бағалаймыз. Комитет пен оның аумақтық департаменттері бұдан әрі де тұтынушылардың мүдделерін қорғауға, заңнаманың орындалуын қамтамасыз етуге және құқықтық мәдениетті арттыруға күш салуды жалғастыратын болады, – деп хабарлайды дерек көзі.
