Кассациялық сот Шығыс Қазақстан облысының тұрғыны әрі заңгер Серікжан Ахметжановтың уақыт белдеуінің өзгеруіне қатысты шағымын қанағаттандырмады. Бұл туралы ҚР Кассациялық сотының баспасөз қызметі мәлімдеді, деп хабарлайды F16.kz.
Талапкер уақыт белдеуін өзгерту астрономиялық уақытқа сәйкес келмейтінін, Үкімет мұндай шешім қабылдауға өкілетті емес екенін және жаңа құжат қабылдануға тиіс екенін көрсетті, — дейді соттың баспасөз қызметі.
Азаматтық істер жөніндегі кассациялық сот Үкімет қабылдаған қаулылар Конституцияның 69-бабында көзделген өкілеттік аясында қабылданғанын атап көрсетті.
Сот шешімінде Үкімет қаулысымен «Уақыт пен эталондық жиіліктер жөніндегі ведомствоаралық комиссия» құрылғаны және оның жұмысы айтылған. Сонымен қатар үш жылдық талап қою мерзімі өтіп кеткенін де атап өтті, — делінген хабарламада.
Сот Астрофизика институты, Генетика және физиология институты, География және су қауіпсіздігі институты және басқа да ғылыми ұйымдар халықаралық тәжірибеге және ғылыми есептерге сүйене отырып елдің 15 өңірінде ең қолайлысы – 5-ші уақыт белдеуі екенін негізге алды.
Осылайша, кассациялық сот шешімі өзгеріссіз қалдырылды.
