Бірыңғай жинақтаушы зейнетақы қорының мәліметінше, «Ұлттық қор – балаларға» бағдарламасының кезекті қаржы аударымы жеке есепшоттарға биылғы 1 ақпаннан кешіктірілмей түседі.
Аталған төлем 2025 жылғы 31 желтоқсанға дейін 18 жасқа толмаған барлық балаларға төленеді. Сонымен қатар 2008 жылы дүниеге келген және 2026 жылы кәмелет жасына жететін азаматтардың осыған дейін жиналған ақшасы да толық көлемде жеке шоттарына аударылады.
Төлем көлемі қанша?
Қазір үшінші рет жүргізілетін төлемнің нақты сомасы бекітілмеген. БЖЗҚ дерегінше, әр балаға есептелетін қаражат мөлшері бірнеше факторға тәуелді. Атап айтқанда:
- елдегі балалар санына;
- Ұлттық банктің Ұлттық қор қаражаты бойынша жүргізген есептеулеріне;
- сондай-ақ Ұлттық қордың жылдық инвестициялық кірісіне байланысты қалыптасады.
Бағдарлама талаптарына сәйкес, балалардың атына жиналған қаржыны тек 18 жасқа толғаннан кейін ғана қолдануға мүмкіндік бар. Қаражатты білім алу мақсатында немесе тұрғын үй жағдайын жақсартуға пайдалануға болады.
Айта кету керек, бұл қаражатты өзге қажеттіліктерге жұмсауға немесе мерзімінен бұрын алуға рұқсат жоқ.
«Ұлттық қор – балаларға» жобасы 2024 жылғы 1 қаңтарда іске қосылған. Жоба аясында Ұлттық қордың жыл сайынғы инвестициялық табысының 50 пайызы кәмелет жасына толмаған балалардың есепшотына аударылады.
2023 жылдың қорытындысы бойынша әр балаға 100,5 АҚШ доллары, ал 2024 жылы 129,4 доллар көлемінде қаражат аударылған.
Былтыр Ұлттық қордың инвестициялық табысы жоғары көрсеткіш көрсетті. Қаржы министрлігінің мәліметінше, былтырғы тоғыз айда қор 6,5 трлн теңге көлемінде инвестициялық кіріс алған.
