Ұлттық ұланның «Шығыс» өңірлік қолбасшылығына қарасты әскери бөлімдерде 2025 жылдың жазғы оқу кезеңі басталды, деп хабарлайды F16.kz тілшісі «Шығыс» өңірлік қолбасшылығының баспасөз қызметіне сілтеме жасап.
Оқу кезеңінің басталу сәтінде әскери оркестрдің орындауындағы Әнұран шырқалып, жауынгерлік ту жоғары көтерілді. Жаңа маусымға аяқ баспас бұрын ұландықтар өткен жылға қысқаша шолу жасап, биылға арналған жоспарларын ортаға салды.
Іс-шара барысында қолбасшылық басқармасының офицерлерімен мемлекеттік-құқықтық дайындық сабақтары өтті. Әскери қызметшілер үшін алғашқы сабақты «Шығыс» өңірлік қолбасшылығы қолбасшысының техника және қару-жарақ жөніндегі орынбасары, полковник Виктор Мухатаев өткізді.
Алаңда сап түзеген ұландықтар қару-жарақ пен әскери техниканы, сондай-ақ әскери мүліктерді дұрыс қолдану, міндеттерді орындау кезінде қауіпсіздік шараларын қатаң сақтау бойынша тәжірибелік сабақтарға қатысты. Іс-шара барысында әскери қызметшілерге қару-жарақты дұрыс қолдану жөніндегі бейнероликтер де көрсетілді.
Жаңа оқу жылында жауынгерлер алдында қоғамдық тәртіп пен қауіпсіздікті қамтамасыз ету бағытында атқарылар нақты міндеттер тұр.
