Бүгін Өскеменде ауа сапасын бақылайтын мобильді экозертхана тестілік режимде жұмыс істеп бастады, деп хабарлайды F16.kz.
Құны 65,5 млн теңге тұратын заманауи жылжымалы кешен зерттеуді жоғары дәлдікпен жүргізетін жабдықтармен қамтамасыз етілген. Оның құрамында 11 параметр бойынша негізгі ластаушы заттарды анықтауға мүмкіндік беретін газ анализаторы бар. Электрохимиялық әдістердің көмегімен өлшеулер жылдам әрі дәл жүргізіледі. Сонымен қатар экозертхана төрт метрлік метеостанциямен жабдықталған.
Енді қалада ауа сапасына қатысты мәселе туындаса, мамандар кез келген ауданға жедел шығып, нақты уақыт режимінде өлшеу жүргізе алады. Зертхана ластану деңгейін анықтап, деректер бірден кәсіпорындар мен экологияны қорғау прокуратурасына жолданады.
Жылжымалы экозертхана қалалық мониторинг жүйесінің маңызды элементіне айналып, Өскемендегі ауа сапасын бақылауды бұрынғыдан да тиімді әрі ашық етеді.
Айта кетейік, зертхананың іске қосылуы Halyk Bank қолдауының арқасында жүзеге асырылды.
