Бүгін Шымкент қаласында ерекше білім беру қажеттіліктері бар (медициналық көрсеткіштері бойынша) балалар оқитын мектеп-интернат тәрбиеленушілеріне арналған заманауи жатақхана пайдалануға берілді. Бұған дейін интернат тәрбиеленушілері 1975 жылы салынған, тозығы жеткен ғимаратта тұрған.
Жаңа жатақхананың жалпы ауданы 8288,70 м², 300 орынға арналған және толықтай заманауи стандарттарға сәйкес келеді. Жалпы аумағы 3,5 гектар жер учаскесінде футбол алаңы (800 м²), воркаут аймағы, ойын алаңдары (450 м²) және демалыс аймақтары (200 м²) қарастырылған.
Ғимараттың ішінде ұлдар мен қыздарға арналған бөлек тұрғын блоктар, жабдықталған медициналық бөлім, кең ойын бөлмелері, сондай-ақ тәрбиеленушілер үшін қолайлы, дамытушы әрі қауіпсіз орта қалыптастыруға бағытталған басқа да функционалдық бөлмелер бар.
Мемлекет басшысының тапсырмасы бойынша бұл жобаға қайтарылған мүлікті сатудан түскен қаражаттар жинақталған Арнаулы мемлекеттік қордан 2,6 млрд теңге бөлінді.
Бұл – бір реттік шара емес. Бас прокуратурамен қайтарған қаражат есебінен елді мекендердің инфрақұрылымын жүйелі түрде дамыту бүкіл ел бойынша жүргізіліп жатыр. Шамамен 500 млрд теңгеге 440 әлеуметтік және коммуналдық нысанның құрылысы қаржыландырылды. Оның 319-ы, яғни мектептер, ауруханалар және сумен жабдықтау жүйелері пайдалауға берілді, — дейді Қазақстан Республикасының Бас прокуроры Берік Асылов.
