28 ақпан мен 2 наурыз аралығында облыс аумағында «Жасөспірім» республикалық жедел профилактикалық іс-шарасы өтті, деп хабарлайды F16.kz.
Шара барысында профилактикалық есепте тұрған отбасылар тексеріліп, жастар көп жиналатын орындар бақылауға алынып, жасөспірімдермен және олардың заңды өкілдерімен әңгіме жүргізілді. Полиция қызметкерлері үш күн бойы күшейтілген режимде жұмыс істеген.
Іс-шара өткізу кезеңінде 161 әкімшілік құқық бұзушылық анықталды. 11 кәмелетке толмаған бала және бала тәрбиесіне немқұрайлы қараған 17 заңды өкіл профилактикалық есепке қойылды. Қабылданған шаралар ауыр зардаптардың алдын алуға және тәуекел тобындағы отбасылардағы жағдайды уақытылы түзетуге мүмкіндік берді, — дейді ШҚО ПД баспасөз қызметі.
Одан бөлек, тәртіп сақшылары өңірдегі мектептер мен колледждерде 150-ден астам кездесу мен дәріс өткізген. Жасөспірімдерге заңнама нормалары, жауапкершілік мәселелері мен жеке таңдау жасаудың маңызын түсіндіріп, толғандырған сұрақтарға жауап берді.
